Рубио: „Странски фактор“ вклучен во заговорот против британската авиобаза

Заговор за таков претпоставен терористички напад врз британска база на Кралските воздухопловни сили (РАФ) што ја користат американските сили „јасно го вклучува ракописот на странски фактор“, изјави американскиот државен секретар Марко Рубио, но одби да даде дополнителни детали.

Шефот на дипломатијата на САД во телевизиско интервју, го спомена Иран, истакнувајќи дека има закани за напад врз американските интереси, но не го обвини директно за инцидентот што се случи за време на викендот, пренесе ДПА.

Техеран решително негираше каква било вмешаност.

Рубио ги опиша настаните што се одвиваа во близина на РАФ Ферфорд во Глостершир како „многу сериозна ситуација“ и им се заблагодари на британските власти за нивната реакција, велејќи дека биле „многу кооперативни и многу од помош“.

Тој исто така истакна дека „многу луѓе се вознемирени“ по ослободувањето со кауција на петмината осомничени, кои беа уапсени во врска со наводниот заговор.

Американскиот претседател Доналд Трамп претходно изјави дека е „изненаден“ што групата е пуштена на слобода.

Британските државјани беа приведени под сомнение за прекршоци поврзани со експлозиви и тероризам во неделата, откако три комбиња беа пронајдени во близина на РАФ Ферфорд, база која се користи од американската армија за извршување напади против Иран.

Жителите кои беа евакуирани од околу 85 домаќинства можеа да се вратат дома вчера, но кордонот остана околу возилата додека противтерористичките полицајци продолжуваат да го истражуваат местото на настанот.

Пронајдениот материјал не бил употреблив експлозив, но полицијата соопшти дека истрагата продолжува.

– Морам да бидам внимателен. Има некои работи што не можам да ги кажам во етер од многу различни причини – изјави Рубио за Фокс Њуз и додаде дека е „доволно да се каже дека она што се случи, она што речиси се случи, она што можеше да се случи во Британија за време на викендот е многу сериозна ситуација“.

– Тоа е ситуација која јасно го вклучува ракописот на странски фактор. Сè уште нема да влегувам во големи детали за тоа. Сакам да им се заблагодарам на властите во Обединетото Кралство кои беа многу кооперативни и на висина на задачата – рече Рубио.

Тој додаде: „Знам дека многу луѓе се вознемирени од веста дека дел од овие луѓе се пуштени со кауција, додека некои од нив се под истрага, и очигледно соработуваме за сè … Покрај тоа, би рекол дека тие беа многу кооперативни и од голема помош за нешто што е многу сериозен инцидент“.

Share on Facebook

Tweet

Follow us

Save