Во напад во училиште во Словачка загина едно лице, а две се повредени

Напад во училиште во северозападна Словачка, извршен од ученик во вторникот, остави една 61-годишна жена мртва, а друга жена и дете се повредени, соопштија спасувачките служби за новинската агенција АФП.

Двајцата повредени, меѓу кои и 44-годишно лице со „убодна рана во градниот кош“, биле пренесени во болница по нападот во училиштето во Штасков, изјави портпаролката на Оперативниот центар на итната медицинска помош, Петра Климешова.

Словачките медиуми објавија дека загинатата жена била наставничка, а двајцата повредени биле друга наставничка и ученик.

Напаѓачот бил ученик во осмо одделение, на возраст од 13 до 15 години, објавија медиумите. Полицијата потврди дека истражува „насилен криминал“, додавајќи: „Ситуацијата сега е под контрола“.

Премиерот Роберт Фицо изрази „искрено сочувство“ и рече дека со „голема загриженост“ го следи „трагичниот инцидент во селото Штасков“.

„Лично, длабоко сум погоден од ова“, рече тој во соопштение.

Претседателот Петер Пелегрини изјави дека е „шокиран што ова е уште еден случај во кој ученик нападнал наставници и соученик“.

„Агресијата и атмосферата на нетолеранција, кои првенствено се шират преку социјалните мрежи и, за жал, и од некои политичари, буквално го трујат јавниот простор и влијаат врз однесувањето на нашите деца во училиштата“, рече тој.

Тој ги повика „сите граѓани да постапуваат на начин што ја смирува атмосферата, наместо дополнително да ја радикализираат“.

Во јануари минатата година, 18-годишник со нож уби соученик и наставник, а повреди уште еден ученик во напад во средно училиште во градот Спишка Стара Вес во североисточна Словачка.

Во 2020 година, наставник беше избоден до смрт, а неколку други лица беа повредени во основно училиште во централна Словачка, што беше првиот насилен напад во училиште во оваа централноевропска земја.

Share on Facebook

Tweet

Follow us

Save