ЕПП го осуди величањето на Младиќ во Србија: Ќе го преиспитаме односот кон партијата на Вучиќ

Европската народна партија (ЕПП) се огласи по повод величањето на воениот злосторник Ратко Младиќ во Србија и наведе дека поради целокупната ситуација ќе се преиспита и односот кон Српската напредна партија на Александар Вучиќ.

Политичкото собрание на оваа партија го осуди величањето на воениот злосторник и наведе дека на погребот учествувале високи функционери од Србија.

„Сцените од погребот на осудениот воен злосторник Ратко Младиќ во Белград беа длабоко вознемирувачки. Младиќ е одговорен за геноцидот во Сребреница и низа најтешки воени злосторства извршени за време на војните во поранешна Југославија. Неговите злосторства ги утврдија меѓународните судови и тие никогаш не смеат да се релативизираат, величаат или заборават. Наместо соочување со ова мрачно наследство, бевме сведоци на јавни и државни почести на неговиот погреб, учество на високи српски функционери и отворен излив на поддршка на јавни места“, наведоа од ЕПП.

Се истакнува и дека ќе се преиспита моменталниот однос кон Српската напредна партија, која има статус на придружна членка на ЕПП.

„Таквите чинови се длабоко вознемирувачки и се во остра спротивност со вредностите на помирување, почитување на жртвите и одговорност што го поддржуваат европскиот проект. Политичкото собрание ги повтори неверувањето и осудата што ги изразија раководството на ЕПП и меѓународната заедница. Во рамките на тековниот процес на надзор над СНС, овие неодамнешни настани не можат да се игнорираат“, порачаа тие.

Share on Facebook

Tweet

Follow us

Save