Поскапеа житото, говедското месо и шеќерот на глобално ниво

Индексот на цените на храната на Организацијата за храна и земјоделство при Обединетите нации (ФАО), кој ги следи месечните промени во меѓународните цени на кошничка со глобално тргувани прехранбени производи, во просек изнесуваше 136 поени во септември 2026 година, што е зголемување од 1,5 проценти во однос на август и 5,8 проценти во однос на пред една година, објави ФАО. Ова е лоша вест и за македонските граѓани, затоа што нашата земја е високо увозно зависна во однос на храната.

– Сведоци сме на постојано и сè пошироко зголемување на глобалните цени на производите, бидејќи прекините во Ормускиот Tеснец и vo Црното Море се комбинираат со климатските шокови, вршејќи притисок врз енергијата, транспортот и клучните прехранбени производи – рече главниот економист на ФАО, Максимо Тореро.

Светските цени на пченицата се зголемија за 6,3 проценти, поради логистичките ограничувања во регионот на Црното Море и сувото време во делови од Северна Америка пред сеидбата, додека глобалните цени на пченката се зголемија за 5,6 проценти од претходниот месец поради загриженоста за приносите во САД, намалената достапност на извоз во Бразил и прекините во трговијата на Црното Море.

Индексот на цените на растителното масло на ФАО се зголеми за 0,9 проценти од август, одразувајќи ги повисоките светски цени на палминото масло поврзани со силната глобална побарувачка за увоз и загриженоста за влијанието на сувото време врз изгледите за производство во Југоисточна Азија.

Индексот на цените на месото на ФАО се намали за 1,1 процент, бидејќи цените на свинското и живинското месо паднаа поради изобилството на извозни залихи. Извозните цени на говедското месо од Бразил пораснаа, поттикнати од зголемената побарувачка за увоз од страна на САД, додека цените на овчото месо останаа главно стабилни.

Индексот на цените на млечните производи се намали за 0,1 отсто, бидејќи падот на цените на сирењето делумно го неутрализираше растот на цените на млекото во прав, додека цените на путерот претрпеа минимални промени.

Индексот на цените на шеќерот на ФАО порасна за 6,1 отсто во однос на август, поттикнат од очекувањата за намалено глобално снабдување со шеќер во сезоната 2026/27. Фактори што придонесоа за ова вклучуваат: очекуваното помало производство на шеќер во Тајланд; загриженоста за изгледите за родот во Индија поради врнежите под нормалата и засилувањето на феноменот „Ел Нињо“; обилните врнежи во централно-јужниот регион за одгледување во Бразил; како и намалувањето на површините засадени со шеќерна репка во Европската Унија.

Share on Facebook

Tweet

Follow us

Save