Протести во Њујорк откако агент на миграциската служба застрела и рани маж

Стотици демонстранти излегоа на улиците на Њујорк откако агент на американската Служба за имиграција и царинска контрола – ИЦЕ застрела и рани 28-годишен маж за време на операција во Марбл Хил.

Ранетиот Оскар Белгал бил погоден во пределот на вратот додека се наоѓал во автомобил, во кој било и неговото петгодишно дете. Детето не било повредено.

Инцидентот предизвика нов судир меѓу администрацијата на американскиот претседател Доналд Трамп и градските власти во Њујорк. Градоначалникот Зохран Мамдани остро ја осуди операцијата и повторно побара укинување на ИЦЕ.

„Да ја укинеме ИЦЕ“, напиша Мамдани на социјалната мрежа „Икс“.

Демонстрантите кои се собраа по пукањето скандираа против федералната имиграциска служба и бараа нејзините агенти да ги напуштат улиците на Њујорк. Дел од протестите прераснаа и во туркање со полицијата.

Според американското Министерство за внатрешна безбедност, Белгал бил цел на „насочена операција за спроведување на законот“. Федералните власти тврдат дека тој одбил да го напушти возилото, се обидел да побегне и удрил во службени возила, по што агентите отвориле оган.

Американскиот министер за внатрешна безбедност Марквејн Малин изјави дека агентите не знаеле дека во автомобилот има петгодишно дете во моментот кога било пукано.

Тој го бранеше постапувањето на агентите и наведе дека Белгал претходно имал судски проблеми, меѓу кои пресуда за тешка кражба и нерешен случај поврзан со продажба на наркотични средства.

Мамдани, од друга страна, ја доведе во прашање оправданоста на употребата на огнено оружје во густо населена станбена област.

„Нема објаснување за федерални агенти да испукаат толку многу куршуми во автомобил во кој има петгодишно дете“, изјави градоначалникот.

Тој соопшти дека разговарал со Трамп и со Малин во обид да обезбеди ослободување на Белгал, но разговорите не дале резултат.

Случајот дополнително ги заостри односите меѓу градските власти во Њујорк и федералната администрација околу имиграциската политика. Њујорк има ограничена соработка со федералните имиграциски власти во повеќе области, додека администрацијата на Трамп ја засили примената на имиграциските закони и депортациите.

Надлежните институции продолжуваат да ги испитуваат околностите под кои дошло до пукањето.

Share on Facebook

Tweet

Follow us

Save