Канадскиот премиер потврди сериозен инцидент во воена база: Голем пожар во Алберта, властите во постојана комуникација

Канадскиот премиер Марк Карни соопшти дека се случил сериозен инцидент во воената база CFB Wainwright, во провинцијата Алберта, кој предизвикал голем пожар. Федералната влада е во постојана комуникација со провинциските и локалните власти, додека се утврдуваат последиците од инцидентот.

„Се случи сериозен инцидент што предизвика голем пожар во CFB Wainwright, во Алберта. Нашите мисли се со сите храбри жени и мажи погодени од овој настан“, се наведува во изјавата на канадскиот премиер.

Карни истакна дека федералните институции тесно соработуваат со владата на Алберта и со локалните власти за справување со последиците.

„Тесно соработуваме со владата на Алберта и локалните власти. Премиерката Даниел Смит и јас сме во постојан контакт, како и нашите надлежни министри и службени лица“, порача Карни.

Изјавата доаѓа во време кога се појавуваат вознемирувачки, но сè уште непотврдени информации за голем број повредени и загинати во инцидентот.

Според неофицијални тврдења што кружат на социјалните мрежи, болниците во Алберта се соочуваат со голем прилив на повредени, додека одредени извори споменуваат десетици загинати и стотици повредени. Овие бројки засега не се независно потврдени.

Во изјавата на канадскиот премиер не се наведуваат бројот на жртвите, причината за пожарот или обемот на материјалната штета.

Share on Facebook

Tweet

Follow us

Save