Масовен украински напад со над 1.000 дронови врз Русија: Погоден голем нафтен терминал, нов удар врз енергетското примирје

Украина започнала масовен воздушен напад врз Русија со повеќе од 1.000 беспилотни летала, при што, според првичните информации, бил погоден голем руски нафтен терминал. Доколку се потврди обемот на операцијата, станува збор за еден од најголемите украински напади со дронови од почетокот на војната.

Информацијата ја објави финансискиот аналитички профил The Kobeissi Letter, кој наведува дека нападот се случува точно седум дена откако американскиот претседател Доналд Трамп соопшти дека Русија и Украина постигнале договор за таканаречено „енергетско примирје“.

Сепак, украинскиот претседател Володимир Зеленски по изјавата на Трамп посочил дека не е запознаен со постоењето на таков договор, со што се отвори прашањето дали воопшто постои формална согласност меѓу Москва и Киев за запирање на нападите врз енергетската инфраструктура.

Според истата објава, Трамп во неколку наврати побарал од Украина да се воздржи од напади врз руските енергетски капацитети, во услови кога американскиот пазар се соочува со сериозен раст на цените на дизелот.

Се наведува дека цените на дизелот во САД пораснале за повеќе од 80 проценти од јануари, што дополнително го зголемува притисокот врз транспортниот сектор, индустријата и потрошувачите.

Потенцијалните последици од нападот би можеле да се почувствуваат и на меѓународните енергетски пазари. Доколку биде потврдено значително оштетување на рускиот нафтен терминал, тоа би можело да предизвика дополнителни нарушувања во извозот на нафта и нафтени деривати, во период на веќе зголемена неизвесност околу глобалното снабдување.

Во објавата се предупредува и на претстојното отворање на нафтените пазари, кога инвеститорите би можеле да реагираат на информациите за нападот.

Според денешните извештаи на Associated Press, нападите предизвикале пожари во Петербуршкиот нафтен терминал и складиштето за нафта Ручи во Санкт Петербург. Руското Министерство за одбрана соопштило дека пресретнало 1.015 дронови над повеќе региони, додека локалните власти пријавиле жртви и повредени.

Во меѓувреме, Зеленски тврди дека Русија во изминатата недела извршила 76 напади врз украинската енергетска инфраструктура, и покрај најавеното примирје.

Најновата ескалација дополнително ја доведува во прашање можноста за прекин на нападите врз енергетските објекти, додека вниманието на меѓународните пазари останува насочено кон потенцијалните последици за цените на нафтата и дизелот.

Share on Facebook

Tweet

Follow us

Save