И од Бугарија бегаат криминалци: Двајца обвинети за палењето на Starlink избегале од земјата

Двајца мажи со германски пасоши, осомничени за палењето на антените што ја поддржуваат сателитската мрежа Starlink на Илон Маск, во таен објект во близина на Софија, успеале да ја напуштат Бугарија. Бугарските власти не знаат каде се наоѓаат, па ќе се потпрат на европска потерница за нивно пронаоѓање и приведување. Денеска, Градскиот суд во Софија треба да го разгледа барањето на обвинителството за издавање европска потерница.

Од минатата недела е познато дека властите ги идентификувале осомничените, на возраст од 21 и 20 години. Тие поседуваат германски пасоши, но не се етнички Германци. Во Бугарија влегле легално преку граничниот премин Кулата.

Палењето се случило во ноќта меѓу 9 и 10 октомври. Намерно биле запалени 11 антени, кои целосно изгореле. Безбедносните камери снимиле две маскирани лица. Тајниот објект, кој ја поддржува комуникациската мрежа на SpaceX, се наоѓа во близина на селото Плана, недалеку од Софија. Од вкупно 18 високофреквентни антени, останале само седум.

Три дена бугарското Министерство за внатрешни работи и безбедносните служби молчеле за инцидентот. Информацијата прв ја објавил лидерот на „Да, Бугарија“, Ивајло Мирчев, на крајот од работниот ден во понеделникот, 12 октомври.

Подоцна, Мирчев во парламентот изјавил дека двајца маскирани мажи, државјани на балканска земја, ги запалиле антените на Starlink во близина на Софија.

Запалените антени служат како клучна врска со сателитите на Маск во вселената. Тие активно се користат и во војната во Украина, каде што овозможуваат важни комуникации. Според првичните сомневања, станува збор за намерен и организиран чин чија цел била саботажа на работата на сателитската програма на Маск.

Претходно, двајца турски државјани осомничени за подметнување пожар во земска сателитска станица на Starlink во Полска биле приведени во Германија.

Share on Facebook

Tweet

Follow us

Save