Францускиот долг ја загрижува Европа: Може ли кризата да ја повлече и Италија?

Растечките трошоци за задолжување и политичката неизвесност во Франција отвораат прашање колку последиците би можеле да се прелеат врз другите европски економии. Според анализата на „Оксфорд економикс“, пренесена од „Еуроњуз“, силен потрес на пазарот на државни обврзници би можел да ги турне Франција и Италија во рецесија во 2027 година. Сепак, должничка криза не е нивното основно прогнозирано сценарио.

Приносот на француските десетгодишни државни обврзници во понеделникот се движеше околу 4,9 отсто, близу највисоките нивоа во повеќе од две децении. Повисокиот принос значи дека инвеститорите бараат поголем надомест за да ѝ позајмат пари на државата.

Францускиот јавен долг на крајот на јуни достигнал 3.596 милијарди евра, односно 119 отсто од бруто-домашниот производ. Владата очекува буџетски дефицит од 5,4 отсто од БДП годинава.

Притисокот се гледа и во каматите: за нив се предвидени 91 милијарда евра во 2027 година, наспроти 79,2 милијарди годинава. Истовремено, владата треба да обезбеди поддршка за буџетот во длабоко поделениот парламент, во пресрет на претседателските избори напролет.

Загриженоста за Италија произлегува од можноста инвеститорите пошироко да го преоценат ризикот од вложување во европски државни обврзници. Кога растат трошоците за задолжување, владите имаат помалку простор за трошење и инвестиции, а поскапото финансирање може дополнително да ја забави економската активност.

Знаци на поширок притисок веќе беа забележани на почетокот на октомври. Разликата меѓу италијанските и германските приноси се зголеми, додека Франција плаќаше повисока цена за задолжување и од Италија.

Сепак, аналитичарите предупредуваат дека движењата на пазарите не се последица само на француските проблеми. Повисоките енергетски трошоци и очекувањата за построга монетарна политика исто така го поскапуваат финансирањето низ еврозоната.

Таквата комбинација ја отежнува позицијата на Европската централна банка: борбата против инфлацијата преку повисоки камати може дополнително да ги оптовари задолжените држави и економиите што веќе губат сила.

Share on Facebook

Tweet

Follow us

Save