INFOMAX.MK

Руската Федерална служба за безбедност (ФСБ) официјално потврди дека од Соединетите Американски Држави добила разузнавачки информации за подготовка на можен терористички напад во Москва, по што руските безбедносни служби започнале со преземање мерки за спречување на потенцијалниот напад.

Како што пренесуваат „Ројтерс“, РИА Новости и ТАСС, информациите биле доставени преку воспоставените канали за соработка меѓу американските и руските безбедносни институции.

„Преку партнерските канали добивме информации од американската страна за подготовка на терористички напад во Москва. Во тек е соодветна оперативна работа“, соопштиле од ФСБ.

Предупредувањето се однесува на музејско-парковскиот комплекс „Царицино“, една од најпознатите историски и туристички локации во јужниот дел на руската престолнина.

Според информациите на руските медиуми, комплексот е привремено затворен за посетители, додека полицијата го ограничила пристапот до околината.

На терен се распоредени безбедносни сили, а сообраќајот на дел од улиците што водат кон комплексот е блокиран. Рускиот медиум „Фонтанка“ објави дека се затворени делови од Касписката и Липецката улица, додека полицијата го контролира пристапот до музејот.

Претходно, американската амбасада во Москва издаде итно безбедносно предупредување за 31 октомври, наведувајќи дека располага со веродостојни информации за закана од напад што би можел да предизвика голем број жртви.

Американските власти ги повикаа своите државјани да го избегнуваат музејскиот комплекс „Царицино“, да не се приближуваат до областа, да избегнуваат поголеми собири и внимателно да ги следат информациите од локалните власти.

Амбасадата истовремено потврди дека Вашингтон директно соработува со руските институции во одговорот на заканата.

Ова не е првпат американските разузнавачки служби да ја предупредат Русија за можен голем терористички напад.

Во март 2024 година, американската амбасада предупреди за опасност од екстремистички напади во Москва, само неколку дена пред масакрот во концертната сала „Крокус сити хол“, во кој загинаа повеќе од 140 луѓе.

Тогаш нападот го извршија вооружени напаѓачи, а одговорноста ја презеде огранок на терористичката организација Исламска држава.

Засега руските власти не соопштуваат кој би можел да стои зад новата закана, дали се идентификувани осомничени лица и дали се извршени апсења.

Исто така, нема потврдени информации дека терористички напад навистина се случил.

Ситуацијата останува под надзор на руските безбедносни служби, додека американското предупредување за можна опасност важи за 31 октомври.

🇷🇺 Moscow: all roads to the Tsaritsyno museum-reserve are closed, with security services on site

The US Embassy in Moscow has warned of a "credible threat of an event that could cause mass casualties" at Tsaritsyno today, October 31, and urged Americans to stay away from the… pic.twitter.com/FMCz9UB9rN

— DD Geopolitics (@DD_Geopolitics) October 31, 2026