(Видео) ИРАНСКАТА ДРЖАВНА ТЕЛЕВИЗИЈА ЕМИТУВАШЕ УПАТСТВА ЗА ПРЕЖИВУВАЊЕ ПРИ НУКЛЕАРЕН НАПАД: Граѓаните добија инструкции да се засолнат во подруми и да останат таму најмалку 24 часа

Иранската државна телевизија и медиумите во земјата објавиле видео со упатства за граѓаните како да постапат во случај на можен нуклеарен напад, во време на зголемени тензии и стравувања од нова ескалација на конфликтот со САД.

Според медиумските извештаи објавени на 3 ноември, видеото содржи конкретни инструкции за заштита од последиците на нуклеарна експлозија. Првото предупредување е граѓаните да не гледаат директно во силниот блесок што би се појавил при експлозијата.

На оние што би се затекнале на отворено им се советува, доколку не можат веднаш да влезат во зграда, да се засолнат зад цврста преграда, да легнат на земја и да ги покријат главата и лицето. Откако ќе помине ударниот бран, треба да влезат во најблиската цврста зграда. Во инструкциите се нагласува дека автомобилите не се безбедно засолниште и дека граѓаните не треба да остануваат надвор за да го набљудуваат или снимаат настанот.

На лицата што ќе успеат да влезат во зграда им се препорачува да се упатат кон подрум или кон централниот дел на објектот, подалеку од прозорците и надворешните ѕидови. Треба да ги затворат вратите и прозорците, како и да ги исклучат клима-уредите и системите за вентилација што внесуваат воздух однадвор.

Видеото содржи и инструкции за постапување при можна изложеност на радиоактивна прашина: внимателно соблекување на надворешната облека, нејзино ставање во затворена кеса и миење со вода и сапун. На граѓаните им се советува да користат флаширана вода и спакувана храна.

Особено се нагласува потребата луѓето да бидат подготвени да останат во засолништата најмалку 24 часа, но и да не претпоставуваат дека по истекот на тој период околината автоматски е безбедна. Излегувањето треба да се случи дури по официјални инструкции од надлежните служби. Во пораката се повикуваат семејствата однапред да ги разгледаат упатствата.

Објавувањето на вакво видео доаѓа во исклучително чувствителен момент за регионот. Американската војска изврши ограничени напади врз ирански цели во близина на Ормускиот Теснец, во пресрет на изборите за Конгресот во САД. Според американски официјален претставник цитиран од Асошиејтед прес, цел на нападите биле ирански сили кои користеле ракети земја-воздух против американски средства. Иранските државни медиуми претходно известиле за експлозии на островите Кешм и Хенгам, како и во близина на Бандар Абас.

Во меѓувреме, „Волстрит џурнал“ објави дека американскиот претседател Доналд Трамп размислува за поголема воена операција по изборите, која би можела да ги опфати иранската инфраструктура и нуклеарните постројки. Сепак, весникот наведува дека Трамп сè уште нема донесено конечна одлука и дека претходно сака да им даде шанса на дипломатските напори.

Засега нема потврда дека Вашингтон планира употреба на нуклеарно оружје против Иран, ниту дека објавеното видео претставува најава за таков напад. Неговата содржина, сепак, покажува дека иранските медиуми ги подготвуваат граѓаните за можноста од најтешко сценарио во конфликтот.

Share on Facebook

Tweet

Follow us

Save