INFOMAX.MK

Српското Министерство за внатрешни работи спроведе акција против сопствени припадници поради сомнежи дека малтретирале и мачеле приведени демонстранти за време на антикорупциските протести во Белград.

Според официјалното соопштение на МВР на Србија, приведени се осум активни и еден поранешен полицаец, на кои им е одредено задржување до 48 часа.

Осомничените биле припадници на Единицата за обезбедување определени личности и објекти, а случајот се однесува на настани од ноќта меѓу 14 и 15 август 2025 година.

Според сомнежите на истражните органи, во гаражата на зградата на Владата на Србија, на улицата Немањина во Белград, полициските службеници употребувале сила и закани кон повеќе приведени лица.

Целта, како што наведува МВР, била од нив да се извлечат информации, да бидат заплашени и незаконски казнети.

Меѓу приведените, според српските медиуми, е и командантот на Специјалната антитерористичка единица, Игор Жмириќ.

Апсењата следуваат по повеќемесечните антикорупциски протести во Србија, кои започнаа по трагедијата на железничката станица во Нови Сад во ноември 2024 година, кога при уривање на бетонска настрешница загинаа 16 лица.

За време на протестите, бројни студенти и активисти пријавуваа прекумерна употреба на полициска сила, физички повреди и психолошки последици.

Приведените ќе бидат изведени пред надлежното обвинителство, кое треба да одлучи за понатамошниот тек на постапката.