Тело на новороденче пронајдено во замрзнувач во Шпанија, можно е да било скриено повеќе од 20 години

Шпанската цивилна гарда истражува откако телото на новороденче било пронајдено во замрзнувач во просторија за складирање во станбена зграда во градот Аљарис, во покраината Оренсе, на северозападот на Шпанија.

Според локалниот весник „Ла Регион“, откритието било направено минатиот понеделник од жена која ги пребарувала личните работи на својата неодамна почината мајка.

Замрзнувачот се наоѓал во просторија за складирање во гаражниот дел од зградата. Кога жената го отворила, во него го пронашла телото на новороденчето.

Првичните податоци укажуваат дека бебето најверојатно било родено по бременост од 32 до 34 недели и дека по раѓањето покажувало знаци на дишење. Сепак, околностите и причината за смртта треба да ги утврди обдукцијата, што ќе ја изврши Галискиот институт за судска медицина.

Истражителите веќе сослушале неколку лица блиски до поранешната сопственичка на замрзнувачот, а примероци од ДНК се испратени во лабораторија во Мадрид, во обид да се утврди идентитетот на биолошките родители на бебето.

Според „Ла Регион“, истражителите не ја исклучуваат ниту можноста смртта да настапила на друго место во покраината, а телото подоцна да било пренесено во Аљарис, заедно со замрзнувачот.

Истрагата е во тек и се води под судска тајна, по наредба на надлежниот суд во Оренсе. Полицијата се обидува да утврди кога и како починало бебето, како и на кој начин неговото тело завршило скриено во замрзнувачот.

Share on Facebook

Tweet

Follow us

Save