Binance првпат се огласи за можниот безбедносен инцидент – започната итна истрага, неизвесност околу милијарди долари

Криптовалутната берза Binance, според објава на социјалната мрежа X што се споделува во јавноста, соопштила дека нејзините безбедносни тимови истражуваат извештаи за потенцијален безбедносен инцидент, во услови на информации за огромни трансфери на криптовалути и можно замрзнување средства од страна на Tether.

Во објавата, соопштение од официјалниот профил на Binance, се наведува дека компанијата е запознаена со информациите за можен безбедносен проблем и дека започнала итна проверка.

„Нашите тимови се запознаени со извештаите за потенцијален безбедносен проблем и активно истражуваат. Во оваа фаза не потврдивме никакво влијание врз средствата на корисниците“, се наведува во објавата.

Ваквата реакција следува по непотврдените информации дека од паричници поврзани со Binance биле префрлени средства во вредност од приближно 2,8 милијарди долари преку пет блокчејн-мрежи.

Истовремено, се појавија тврдења дека Tether замрзнал околу 971 милион долари во USDT, наводно поврзани со сомнителни трансакции и можен хакерски напад.

Засега не е потврдено дали овие трансакции се меѓусебно поврзани, ниту дали претставуваат кражба, интерно префрлање средства или друга финансиска активност.

Според приложената објава, безбедносните тимови на Binance ги проверуваат сите релевантни информации и најавуваат дополнителни соопштенија веднаш штом ќе бидат потврдени фактите.

Компанијата истовремено ги предупредува корисниците да бидат внимателни со потенцијални измами и да не отвораат неофицијални линкови или да споделуваат информации за своите сметки.

Доколку се потврди дека станува збор за хакерски напад со загуби од стотици милиони или милијарди долари, тоа би можело да претставува еден од најсериозните безбедносни инциденти во историјата на криптовалутниот сектор.

Во моментов најважно е што во приложеното соопштение не се потврдува загуба на кориснички средства, но не се исклучува постоење на безбедносен проблем.

Share on Facebook

Tweet

Follow us

Save