BMW планира да укине 8.000 работни места до крајот на следната година

Со цел да заштеди неколку милијарди евра за компанијата, Баварците нудат огромни отпремнини за дел од вработените. BMW испрати електронски пораки до десетици илјади вработени со линк до порталот, каде што тие можеа да го видат износот на понудената отпремнина. За да ја напуштат компанијата, износот што се нуди варира во зависност од возраста на вработениот, должината на стажот во BMW и висината на платата.

Оние што ќе ја прифатат понудата можат да изберат исплатата да ја добијат како еднократен износ, преку рати, како делумна уплата во пензиски фонд, уплата во полиса за осигурување или комбинација од сите овие опции. Оние што ќе си заминат до 31 март 2027 година, ќе имаат право на дополнителен „турбо бонус“. Алтернативно, можат да си заминат до 31 октомври 2027 година, но во тој случај нема да го добијат дополнителниот бонус.

Вработените што ќе наполнат 55 години до 31 октомври следната година, би можеле да добијат пристап до програмата за „пензионери на BMW“, која им овозможува одредени привилегии, како што се специјални цени за вработени при купување нови или половни возила од марката BMW. На вработените на високи позиции, пак, може да им се понуди можност да го откупат службениот автомобил што моментално го користат.

Интересот за програмата бил толку голем што онлајн порталот почнал да откажува послушност веднаш по неговото пуштање во употреба. BMW ќе ги разгледа пристигнатите пријави пред да одлучи кој точно ќе ја напушти компанијата и колкав ќе биде износот на исплатата за секој од нив. Извршниот директор на BMW, Милан Недељковиќ, сака компанијата да заштеди по 1 милијарда евра годишно, почнувајќи од 2028 година, со цел дотогаш да ја зголеми оперативната маржа од 3% на 5%.

Исто така, поставена е долгорочна цел маржата да се зголеми на ниво помеѓу 8% и 10% во раните 2030-ти години. Под водство на Недељковиќ, BMW започнува амбициозно лансирање на нови модели, вкупно 40 нови или освежени автомобили до крајот на 2027 година. Некои од нив се веќе најавени, вклучувајќи ги новиот i3 и моделите од Серијата 3.

Share on Facebook

Tweet

Follow us

Save