ВЛЕН: Скандалозно, ДУИ не ги поддржа измените за Универзитетот „Мајка Тереза“

ВЛЕН обвини дека пратениците на ДУИ не ги поддржале измените на Статутот на Универзитетот „Мајка Тереза“ во Скопје, кои денеска беа усвоени во Собранието.

Според ВЛЕН, станува збор за важна одлука што овозможува понатамошна консолидација и развој на оваа високообразовна институција на албански јазик, додека однесувањето на ДУИ го оценија како „парламентарен скандал“.

„Кога дојде моментот да се гласа за Универзитетот ‘Мајка Тереза’, ВЛЕН и парламентарното мнозинство гласаа ‘за’, додека ДУИ не ја поддржа одлуката“, соопштија од коалицијата.

Со усвоените измени се формализира работата на Правниот факултет, Економскиот факултет и Факултетот за хуманистички науки, а се овозможува и издавање дипломи и додатоци на дипломи на албански, македонски и англиски јазик. Дополнително, со измените се усогласува функционирањето на универзитетот со актуелната законска регулатива.

Од ВЛЕН оценуваат дека е „скандалозно“ партија која, како што наведуваат, често се претставува како заштитник на албанските интереси, да не поддржи одлука која директно го зајакнува институционалниот капацитет на Универзитетот „Мајка Тереза“ и создава подобри услови за студентите.

„Албанските граѓани и студентите заслужуваат да ја знаат вистината. Разликата е јасна – ние работиме на зајакнување на албанските институции, додека други остануваат само на реторика“, наведуваат од ВЛЕН.

Оттаму додаваат дека усвоените измени претставуваат значаен чекор за развојот на универзитетот и за унапредување на високото образование, со цел студентите да добијат поквалитетни услови за студирање и институција која ќе биде целосно усогласена со современите образовни стандарди.

Ставот на ДУИ во однос на гласањето засега не е официјално образложен, додека политичките реакции околу ова прашање продолжуваат.

Share on Facebook

Tweet

Follow us

Save