Газда на фирма затаил околу 120.000 евра данок преку лажни книжења за продажба на нафта

Управата за финансиска полиција поднесе кривична пријава против сопственик на фирма кој затаил данок од над 117.000 евра преку фиктивни книжења од продажба на нафта.

Осомничениот, со иницијали М. Д., во 2021 година преку фиктивно книжење присвоил парични средства од продажба на нафта и на нафтени деривати во износ од околу 114.000 евра.

Според Управата, тој не пресметал и не уплатил данок на личен доход во износ од 12.714 евра.

Дополнително, осомничениот преку фиктивни сметководствени записи извршил промени во евиденцијата на залихи, приходи, обврски за ДДВ и во набавната вредност на продадената стока, со што избегнал плаќање на данок на додадена вредност од 26.879 евра, данок на личен доход од 12.714 евра и на данок на добивка од 10.800 евра.

Финансиската полиција наведува и дека во 2024 година М. Д. присвоил евидентирана залиха на стоки во вредност од 205.304 евра, која не ја прикажал како кусок во сметководството на фирмата.

Со тоа, според наводите, не бил пресметан и платен данок на додадена вредност од околу 31.290 евра и данок на личен доход од околу 22.800 евра.

Од Управата додаваат дека пријавениот го оштетил Буџетот на Македонија за вкупно 117.216 евра, а против него биле поднесени кривични пријави за „даночно затајување“ и за „фалсификување или уништување на деловни книги“.

Share on Facebook

Tweet

Follow us

Save