INFOMAX.MK

Андриј Јермак, човекот што важеше за најмоќниот и најдоверлив соработник на украинскиот претседател Володимир Зеленски, поднесе оставка, само неколку часа по рацијата на Националното биро за борба против корупцијата (НАБУ) во неговите простории, во момент кога земјата се соочува со најголемиот корупциски скандал откако Зеленски дојде на власт, пренесува „The Kyiv Independent“.

Во средиштето на скандалот се наоѓа државната нуклеарна компанија „Енергоатом“. НАБУ претходно овој месец поднесе обвиненија против осум лица, а истражителите го именуваа Тимур Миндич – еден од најблиските соработници на Зеленски – како водач на коруптивната шема. Миндич успеа да избега од Украина непосредно пред да му бидат поднесени обвиненија, а претседателот веднаш по бегството воведе санкции и го стави на листата на барани лица.

Украинските антикорупциски институции влегоа во куќата на шефот на кабинетот на Зеленски

Скандалот веќе ги срушил првите политички жртви. Министрите Херман Халушченко и Свитлана Гринчук беа отпуштени на 19 ноември, а под истрага е и Рустем Умеров, секретарот на Советот за национална безбедност и одбрана. Иако немаат формални обвиненија, истрагата продолжува да се шири.

Претседателот Зеленски ја потврди оставката на Јермак со кратко соопштение.

„Ќе има ресетирање на Канцеларијата на претседателот. Благодарен сум на Андриј за неговата служба и за тоа што секогаш ја застапуваше позицијата на Украина токму како што требаше.“, напиша тој.

Зеленски најави дека утре ќе одржи консултации за тоа кој ќе го наследи Јермак, позиција која во последните години стана една од највлијателните во украинската политика.

Според информациите на „Украинска правда“, истражителите го воделе Јермак под кодното име „Али Баба“. Во описите на обвинителите стои дека тајно координирал притисок врз истражителите на НАБУ и врз антикорупциските обвинители, обидувајќи се да ги попречи токму истрагите што сега го стигнуваат. Дополнителни полициски извори тврдат дека една луксузна вила во близина на Киев, финансирана преку коруптивната мрежа, била наменета токму за него.

Јермак, познат по својата тишина во кризни моменти, досега не се огласи. Ниту Кабинетот на претседателот одговори на прашањата од медиумите.

Именуван во 2020 година, тој со години важеше за клучниот стратег, тивкиот преговарач и неформалниот столб на администрацијата на Зеленски. Многумина во Киев, со почит или страв, го нарекуваа „сивиот кардинал“. Иако често критикуван, Зеленски го бранеше до последен момент.