Голдман Сакс повторно ја зголеми прогнозата за цената на нафтата поради прекини во снабдувањето

Банкарската групација Голдман Сакс, со седиште во Њујорк, повторно ја ревидираше нагоре прогнозата за цената на нафтата, велејќи дека пазарот би можел да остане под притисок од продолжените прекини во снабдувањето и високите цени на енергијата.
Банката сега очекува цената на суровата нафта Брент да биде во просек околу 90 долари за барел во четвртиот квартал од 2026 година, додека суровата нафта Тексас WTI треба да се движи околу 83 долари за барел, објавува порталот Oilprice.

Според анализата на банката, пазарот на нафта сè уште е силно погоден од прекините во снабдувањето, првенствено поради застојот во преговорите меѓу САД и Иран и намалената достапност на нафта од Блискиот Исток.
Голдман Сакс проценува дека изгубеното производство во регионот на Блискиот Исток достигна околу 14,5 милиони барели дневно, што претставува историски високо ниво на прекини.

Во тековниот квартал се очекува пад на глобалната потрошувачка од околу 1,7 милиони барели дневно, додека во 2026 година потрошувачката би можела да биде помала за дополнителни 100.000 барели дневно во споредба со претходната година.

Банката вели дека залихите на нафта се исцрпуваат пребрзо и ова не може да трае долго. Доколку проблемите со снабдувањето продолжат, потрошувачката на енергија ќе мора дополнително да се намали, со повисоки цени на пазарот, вели Голдман Сакс. Аналитичарите на холандската банка ING размислуваат на сличен начин и предупредуваат дека за да се покрие недостигот од снабдување, потребна е значително повисока цена на нафтата за да се намали побарувачката.

Share on Facebook

Tweet

Follow us

Save