Да се фокусираат на нешто друго – Трамп: Време е Американците да се ослободат од досиејата на Епстин

Американскиот претседател Доналд Трамп изјави дека е време Американците да се ослободат од досието на Џефри Епстин и одби да одговори на прашања во врска со жалбите на преживеаните жртви на осудениот сексуален престапник.

„Мислам дека е навистина време земјата да се фокусира на нешто друго. Сега кога ништо не излезе на виделина за мене, освен што беше заговор од Епстин и други против мене, мислам дека е време земјата можеби да се фокусира на нешто друго“, рече Трамп од Белата куќа, пренесува американски „Хил“.

Трамп одби да одговори на прашањето на новинар на Си-ен-ен за загриженоста на преживеаните на Епстин во врска со досието објавено од Министерството за правда на САД.

Трамп, исто така, ги отфрли извештаите дека во досиејата се наведени неговите сојузници и пријатели, како што се милијардерот Илон Маск и министерот за трговија Хауард Лутник.

„Сигурен сум дека добро се справуваат. Инаку, би биле на насловните страници“, рече Трамп.

Share on Facebook

Tweet

Follow us

Save