За 30% е зголемен интересот за инженерските факултети, младите знаат каде оди светот, вели Мицкоски

Премиерот Христијан Мицкоски вели дека Владата ќе продолжи да ја насочува економијата кон вештачката интелигенција и дата-центрите, оценувајќи дека Македонија има знаење и кадар за да го следи правецот во кој се движи глобалната економија.

Како аргумент дека и младите го препознаваат овој тренд, Мицкоски посочи дека интересот за студирање инженерски науки е зголемен.

„Имаме знаење, знаеме како. Ме охрабрува податокот што на факултетите за инженерски науки за 30 проценти е зголемен интересот за запишување. Конкретно го добив податокот од мојот матичен факултет, Машинскиот факултет. Тоа значи дека младите јасно се определуваат каде оди човештвото“, рече Мицкоски.

Тој порача дека Владата ќе се обиде да го искористи тој процес за развој на економијата и создавање поголема додадена вредност.

„Ние ќе го фатиме тој процес. Додека сум јас претседател на Владата, натаму ќе ја развивам државата“, рече премиерот.

Во продолжение, Мицкоски упати остри политички критики кон опозицијата, тврдејќи дека нејзиниот претходен економски модел се темелел на „марихуана економија“ и изнесувајќи обвинувања за исплата на „арач“ во ресторан во југоисточна Македонија. За овие тврдења во неговата изјава не беа понудени конкретни докази.

„Ние како Влада, во оваа насока, со вештачка интелигенција, ќе ја развиваме нашата економија и додадената вредност во нашата економија“, рече Мицкоски.

Тој ја поврза експанзијата на вештачката интелигенција и дата-центрите и со економските движења во Соединетите Американски Држави, оценувајќи дека токму тие сектори се важен двигател на американската економија.

Мицкоски тврдеше дека без придонесот на вештачката интелигенција и дата-центрите американската економија би била во рецесија, па дури употреби и формулација дека би била „во банкрот“. Станува збор за оценка на премиерот изнесена во политички контекст.

Според него, дилемата за Македонија е дали ќе го следи технолошкиот развој или ќе остане заглавена во политички дебати кои, како што рече, немаат врска со реалноста.

„Сите ние треба сега да одлучиме дали ќе влеземе во политичко мочуриште на опозиција која не се разбира и која испраќа вести кои немаат никаква врска со реалноста, или ќе го фатиме чекорот со правецот во кој се движи човештвото“, рече Мицкоски.

Како пример за брз економски и инфраструктурен развој, тој ги посочи Дубаи, Абу Даби и Доха, наведувајќи дека местата кои денес се симбол на големи инвестиции пред неколку децении изгледале сосема поинаку.

Share on Facebook

Tweet

Follow us

Save