Иран предупредува: нов судир со САД е на повидок – Техеран подготвил ‘мерки на изненадување

Тензиите меѓу Иран и САД повторно растат – висок ирански воен функционер предупреди дека е можен нов конфликт по одбивањето на најновиот мировен предлог од американскиот претседател Доналд Трамп.

Портпаролот на иранскиот воен штаб, генерал Мохамад Џафар Асади, изјави дека Вашингтон не ги почитува своите договори и најави „мерки на изненадување“ за кои противникот, како што рече, „не може ни да претпостави“.

Иранските медиуми повторно ја нагласуваат цврстата позиција на Техеран околу Хормускиот теснец – клучна артерија за глобалниот транспорт на нафта. Полуслужбената агенција „Тасним“ објави дека морнарицата на Револуционерната гарда ќе обезбеди теснецот да остане под иранска контрола, оценувајќи го како извор на безбедност и економска стабилност за регионот.

Овие пораки доаѓаат како реакција на изјавите на Трамп, кој по неодамнешното примирје повторно побара слободна пловидба низ Хормускиот теснец. Тој изрази незадоволство од иранскиот предлог за решавање на кризата, оценувајќи дека условите на Техеран не се прифатливи за Вашингтон.

Ситуацијата ја отвора дилемата: дали светот е на прагот на нова ескалација во Персискиот залив или ќе се најде дипломатско решение? За сега, Иран испраќа порака дека нема намера да попушти, а САД инсистираат на слободна пловидба – судир на интереси кој може да ја одреди иднината на регионот.

Share on Facebook

Tweet

Follow us

Save