КАТАСТРОФАЛЕН ПАД НА МАШКОСТА И ТЕСТОСТЕРОНОТ: Западот се соочува со исчезнување по овие бројки

Просечните нивоа на тестостерон кај мажите се намалиле за повеќе од 50 проценти во текот на изминатите пет децении. Ова го покажа нова студија презентирана на конгресот на Европското здружение за човечка репродукција и ембриологија (ESHRE) во Лондон.

Студијата вклучува анализа на податоци од повеќе од 8.650 студии спроведени помеѓу 1972 и 2019 година, на примерок од 102.334 испитаници од пет земји, вклучувајќи ги Израел, САД, Бразил, Финска и Данска.

Истражувачите, предводени од Хагај Левин од Брауновата школа за јавно здравје на Хебрејскиот универзитет во Хадаса во Израел, известуваат дека просечната стапка на опаѓање од 1979 година, заедно, е 54 проценти, а темпото на опаѓање се чини дека се забрзало особено по 2000 година. Тоа е пад од околу еден процент секоја година, што научниците велат дека укажува на силен тренд, а не резултат на случајност или статистичка грешка, предупредуваат тие.

Студијата истакнува дека дебелината и дијабетесот се главните фактори што придонесуваат за намалување на нивото на тестостерон, додека факторите на животната средина, вклучувајќи ги и хемикалиите што ја нарушуваат работата на ендокриниот систем, исто така би можеле да играат значајна улога.

Како што нивото на телесни масти се зголемува поради дебелината, тестостеронот се претвора во женскиот хормон естроген, додека инсулинската резистенција кај дијабетичарите и хронично високиот шеќер во крвта можат да ја оштетат функцијата на хипоталамусот и хипофизата во мозокот. Ова, пак, може да ги намали мозочните сигнали што му кажуваат на телото да произведува тестостерон, велат истражувачите.

Авторите истакнуваат дека тестостеронот игра важна улога во производството на сперматозоиди, регулирањето на сексуалната желба, но и одржувањето на расположението, нивото на енергија, метаболизмот, мускулната маса и густината на коските.

Студијата, насловена како „Временски трендови во вкупниот и слободниот тестостерон (1972–2019): Систематски преглед и анализа на мета-трендовите“, која сè уште не е подложена на рецензија од страна на колеги, се темели на претходни истражувања од истата група научници што покажаа значителен пад на бројот на сперматозоиди кај мажите во текот на изминатите неколку децении.

Истражувачите нагласуваат дека терапијата со тестостерон не е универзално решение, бидејќи може да го намали природното производство на тој хормон во телото.

Тие исто така предупредуваат дека светот поминува низ сериозна криза со репродуктивното здравје на мажите, на која не ѝ се посветува доволно внимание и повикуваат на усвојување на соодветни мерки во областа на јавното здравје.

Share on Facebook

Tweet

Follow us

Save