Километарски колони на ГП Богородица

Првиот летен викенд донесе зголемен сообраќај и долги колони кон Грција. Голем број граѓани од Македонија и од регионот уште од утринските часови се упатија кон грчките туристички места, што предизвика застои и бавно движење на возилата на граничниот премин „Богородица“.

Според информации од терен и објави на социјалните мрежи, задржувањата за излез од државата биле значителни, а колоните во одредени периоди се протегале и по неколку километри.

Дел од патниците се обиделе да ги избегнат гужвите преку други гранични премини, но и таму бил регистриран засилен интензитет на сообраќајот.

Почетокот на сезоната на годишни одмори, завршувањето на учебната година и продолжениот викенд дополнително го зголемија бројот на патници кон јужниот сосед. Најголем метеж, како и вообичаено, има на релацијата Богородица – Евзони, која е најчестиот избор за туристите што патуваат кон Халкидики, Пиерија и другите летувалишта во Грција.

Патници сведочат дека во одредени делови од денот се чекало со часови, а колоните се движеле бавно поради големиот број возила што истовремено пристигнувале на преминот.

Надлежните апелираат граѓаните пред тргнување да ја проверат состојбата на граничните премини и да планираат повеќе време за патување бидејќи слични гужви се очекуваат и во следните летни викенди.

Share on Facebook

Tweet

Follow us

Save