Маричиќ предложен за претседател на ДИК

Бојан Маричиќ е предложен да биде нов претседател на Државната изборна комисија, додека актуелниот претседател Борис Кондарко би продолжил во новиот состав, но како член, објави ТВ24 повикувајќи се на висок партиски функционер. Според истиот извор, одлуката ја донел претседателот на СДСМ, Венко Филипче, и предлогот попладнево бил доставен до Собранието.

Развојот доаѓа по седницата на собраниската Комисија за прашања на изборите и именувањата од 12 јануари, на која беше утврдена листата на пријавени кандидати за новиот состав на ДИК. Според официјално објавените информации, пријавени се 16 кандидати, од кои седум конкурираат за претседател, а дел од нив во апликациите навеле можност да бидат избрани и за потпретседател или член.

Во таа листа, Маричиќ е наведен како кандидат за претседател или член, додека Кондарко – кој ја предводи ДИК во актуелниот состав – се пријавил за член. Комисијата најави дека утврдената листа ќе биде доставена до претседателот на парламентот, по што следуваат натамошните чекори за избор на новото раководство и членството на Комисијата.

Доколку предложеното кадровско решение добие политичка поддршка и формална потврда во Собранието, тоа би значело промена на врвот на институцијата што ги организира и надгледува изборните процеси во земјата, во период кога прашањата за изборни правила и доверба во институциите повторно се во центарот на јавната дебата.

Share on Facebook

Tweet

Follow us

Save