Менингитис меѓу студенти во Англија: има жртви и масовни редици за антибиотици

Сериозен бран на менингитис се шири меѓу младите во Англија, каде се регистрирани најмалку 15 случаи, две жртви и повеќе од десет хоспитализирани.

Најпогоден е регионот Кент, каде здравствените власти веќе преземаат итни мерки за спречување на ширењето на заразата. Станува збор за инвазивна менингококна болест, која може да напредува многу брзо и да има фатален исход доколку не се третира навреме.

Болеста најмногу се шири меѓу студенти и средношколци, особено во средини со блиски контакти како студентски домови, училишта и ноќни клубови. Дел од случаите се поврзуваат со настан во ноќен клуб во Кент, по што започна масовно следење на контакти.

На терен, ситуацијата потсетува на пандемиски услови – редици од млади луѓе чекаат за превентивна терапија, додека здравствените служби контактираат илјадници лица кои можеби биле изложени на ризик.

Властите апелираат сите што биле во контакт со заразени веднаш да побараат медицинска помош, бидејќи раното лекување значително ги зголемува шансите за закрепнување.

Дополнителен ризик претставува фактот што дел од младите не се вакцинирани против одредени соеви на менингитис, особено типот Б, кој најчесто ги погодува тинејџерите и младите возрасни.

Менингитисот е сериозна инфекција која ги зафаќа обвивките околу мозокот и ’рбетниот мозок и може да доведе до тешки последици или смрт за кратко време. Симптомите често личат на грип или настинка, што ја отежнува навремената дијагноза.

Здравствените власти во Велика Британија внимателно ја следат ситуацијата и преземаат мерки за нејзино ставање под контрола, но брзото ширење на нови случаи предизвикува сериозна загриженост.

Share on Facebook

Tweet

Follow us

Save