Мицкоски од Њујорк: Наместо промена на институциите, некои земји во ЕУ бараат промена на нашиот идентитет

Премиерот Христијан Мицкоски, во своето обраќање на престижниот самит „Конкордија“ во Њујорк, испрати силни пораки за предизвиците на македонските евроинтеграции, стратешкото сојузништво со САД и економската стабилизација на земјата.

ЕУ интеграции: Борба за институции или за идентитет?

Осврнувајќи се на македонскиот пат кон Европската Унија кој трае речиси две и пол децении, премиерот Мицкоски изрази жалење за огромната фрустрација меѓу граѓаните поради бројните отстапки – од промената на знамето до промената на уставното име. Тој потенцираше дека за неговата генерација, преговорите со ЕУ значеле трансформација на институциите, а не промена на идентитетот.

„За жал, има некои земји членки кои се обидуваат да решат билатерални прашања и да го променат нашиот идентитет. Ние сме жртва на еден вид малтретирање: или сте внатре или сте надвор, а ако сакате внатре, мора да го проголтате она што го бараме од вас. Сепак, ние веруваме во европските вредности и нема подобра опција за мојата земја“, истакна Мицкоски.

И покрај овие пречки, тој најави позитивни сигнали од Брисел, споменувајќи неформален документ презентиран од Франција и Германија кој наскоро би можел да стане официјална политика на ЕУ.

Пример за американското присуство и крстосница на НАТО
Во контекст на надворешната политика, Мицкоски го нагласи продлабочувањето на стратешкото партнерство со САД, поткрепено со нови договори во воената индустрија, енергетиката и рударството (ископување на антимон со помош на американската агенција ДФЦ). Неговата амбиција е Македонија да стане вистински пример за американското присуство во Европа.

На инфраструктурен план, премиерот ги истакна капиталните енергетски проекти кои ја зајакнуваат позицијата на земјата. Обновениот нафтовод со Солун веќе носи бенефити и пониски цени на горивата, додека изградбата на гасоводниот интерконектор што ќе го поврзе пристаништето Александрополи со Централна Европа преку Србија ја позиционира Македонија како клучна транзитна држава. Вкрстувањето на Коридорите 8 и 10, според премиерот, е од огромно стратешко значење за источното крило на НАТО.

Економска стабилизација и рекорден раст

Мицкоски се пофали и со одлични економски перформанси постигнати во услови на глобални кризи. Тој посочи дека реалниот економски раст во вториот квартал од 2026 година изнесува 4,3 проценти (номинално над 8%), што ја сместува Македонија меѓу првите три земји во Европа. Истовремено, инфлацијата е ставена под контрола на ниво меѓу 2 и 2,5 проценти, што е под европскиот просек и претставува најдобар резултат во регионот.

Share on Facebook

Tweet

Follow us

Save