Пезешкијан: Повторното отворање на Ормутскиот теснец е невозможно со толку очигледно кршење на прекинот на огнот

Иранскиот претседател Масуд Пезешкијан ги обвини САД за „бесконечна лицемерна реторика“ и рече дека блокадата, заканите и, како што тврди тој, прекршувањето на обврските од страна на САД се главните пречки за вистински преговори меѓу двете земји.

Во објава на социјалната мрежа X, Пезешкијан истакна дека Иран „поддржува дијалог и договор и продолжува да го прави тоа“, но додаде дека „светот гледа контрадикција меѓу изјавите и постапките“ на американската страна.

Неговите изјави доаѓаат откако американскиот претседател Доналд Трамп објави продолжување на примирјето со Иран, додека ја одржува американската поморска блокада на иранските пристаништа.

Слична порака испрати и претседателот на иранскиот парламент, Мохамед-Багер Галибаф, кој нагласи дека „целосен прекин на огнот има смисла само ако не се прекрши“, предупредувајќи особено за американската блокада на иранските бродови во Ормутскиот теснец.

„Повторното отворање на Ормутскиот теснец е невозможно со толку очигледно кршење на прекинот на огнот“, рече Галибаф, еден од клучните преговарачи во политичкото раководство на Иран.

САД одбија да ја укинат блокадата на бродовите што влегуваат или излегуваат од иранските пристаништа, по што Иран ја повлече својата краткотрајна одлука за повторно отворање на Ормутскиот теснец, обвинувајќи го Вашингтон за кршење на условите на примирјето.

Тензиите дополнително се зголемија откако Иран нападна три товарни брода во теснецот и објави дека запленил два, дополнително одвраќајќи го меѓународниот превоз од минување низ овој клучен глобален воден пат.

Во такви околности, изгледите за продолжување на преговорите остануваат неизвесни, додека Техеран инсистира дека без укинување на блокадата и прекин на притисокот, нема услови за сериозен дипломатски напредок.

Share on Facebook

Tweet

Follow us

Save