Путин: Ќе спроведеме објективна истрага доколку добиеме информации за инцидентот

Рускиот претседател Владимир Путин се осврна на инцидентот со дрон кој наводно паднал на територијата на Романија, при што ги критикуваше реакциите од Европската Унија и понуди Русија да спроведе истрага под одредени услови.

Путин тврди дека Европската Унија автоматски покажува со прст кон Русија по секој ваков инцидент. „Првата реакција во ЕУ на кој било дрон е да го прогласат за руски, а потоа се покажува дека не е“, изјави тој.

Во врска со конкретниот случај, порача дека Москва е подготвена да ги истражи околностите на падот на леталото доколку добие потребни информации. „Ако добиеме објективни податоци за падот на дронот во Романија, ќе спроведеме објективна истрага“, рече Путин.

Русија ги отфрла обвинувањата

Пред изјавата на Путин се огласи и портпаролката на руското Министерство за надворешни работи Марија Захарова, која ги отфрли тврдењата дека руски дронови се одговорни за инциденти над европска територија.

„Сите обвинувања што ги слушаме, особено за беспилотни летала некаде во земјите на Европската Унија, се целосно неосновани, не се презентирани ниту факти, ниту материјали, ниту докази“, изјави Захарова, пренесува руската новинска агенција РИА.

Нејзината изјава доаѓа по информациите на романските власти дека дронот кој ноќта погодил станбена зграда во Галаци бил од руско потекло и носел експлозив. Букурешт го оцени инцидентот како сериозно кршење на својот суверенитет и воздушен простор, додека НАТО и бројни европски функционери изразија поддршка за Романија.

Москва, меѓутоа, продолжува да ја отфрла одговорноста. Додека Путин тврди дека Европската Унија пребрзо заклучува дека станува збор за руски летала, Захарова порача дека за таквите обвинувања не се презентирани никакви докази. Руските власти засега не признаваат официјално дека леталото што паднало во Романија било руско.

Share on Facebook

Tweet

Follow us

Save