Рубио: Понудата на Иран за отворање на Ормуската Теснина е неприфатлива за САД

Американскиот државен секретар Марко Рубио денеска изјави дека понудата на Иран за повторно отворање на Ормуската Теснина под строги услови не е прифатлива за САД, ниту за другите земји.

– Она што тие го подразбираат под отворање на преминот е тој да биде отворен за пловидба сè додека минувањето низ него се координира со Иран и се добива нивна дозвола, или ќе ве кренат во воздух и ќе ви наплатат – изјави американскиот функционер и повтори дека САД нема да толерираат обиди за држење на меѓународните пловни патишта како „заложници“.

Според Рубио, тоа не е отворање на Ормуската Теснина, која, инаку, претставува меѓународни води.

– Тие не можат да го прикажат како нормален, ниту пак ние можеме да им го толерираме тоа, системот според кој Иранците се тие кои одлучуваат кој ќе го користи теснецот – рече американскиот државен секретар во интервју за Фокс њуз.

Рубио истакна дека Иран е „сериозен“ во врска со постигнувањето договор со САД, но наведе и дека каков било договор мора да вклучува спречување на Иран да развива нуклеарно оружје.

– Мислам дека се сериозни во врска со извлекувањето од нередот во кој се наоѓаат – наведе Рубио.

Тој оцени дека во Иран од почетокот на војната се влошени економските услови како што се инфлацијата, проблемите во исплатата на платите и санкциите.

– Сите проблеми што ги имаше Иран пред почетокот на овој конфликт и понатаму се присутни, а повеќето од нив се полоши. Мораме да се погрижиме каков било договор дефинитивно да го спречи Иран во кој било момент да оди кон нуклеарно оружје – заклучи Рубио.

Иран претходно им изнесе на САД нов предлог за повторно отворање на Ормуската Теснина и за ставање крај на војната, додека нуклеарните преговори се одложени за подоцнежна фаза, пренесе денеска Аксиос, повикувајќи се на еден американски функционер и два извори запознаени со ситуацијата.

Новиот предлог, даден на САД преку пакистански посредници, прво се фокусира на решавање на кризата околу теснецот и американската блокада. Како дел од тоа, прекинот на огнот би бил продолжен на подолг период или страните би се согласиле за трајно завршување на војната.

Share on Facebook

Tweet

Follow us

Save