Русија ја нападна Украина со „Орешник“: „Одговор за нападот на резиденцијата на Путин“

Како одговор на нападот на Киев врз резиденцијата на рускиот претседател Владимир Путин, руските војници извршија масовен удар врз клучни украински цели, вклучително и со користење на ракетниот систем Орешник. Ова го соопшти руското Министерство за одбрана, цитирано од ТАСС.

„Вечерва, како одговор на терористичкиот напад на режимот во Киев врз резиденцијата на претседателот на Руската Федерација во Новгородската област, извршен во ноќта на 29 декември 2025 година, вооружените сили на Руската Федерација извршија масовен удар со високопрецизно оружје со долг дострел базирано на копно и море, вклучувајќи го и ракетниот систем со среден дострел Орешник, како и ударни беспилотни летала, врз критично важни цели на територијата на Украина“, се вели во соопштението.

Руското воено министерство изјави дека „зададените цели на ударот се постигнати“. „Оштетени се објекти за производство на беспилотни летала што се користат во терористичкиот напад, како и енергетска инфраструктура што го обезбедува функционирањето на украинскиот воено-индустриски комплекс“, додаде министерството.

На 29 декември, рускиот министер за надворешни работи Сергеј Лавров објави дека Украина ја нападнала резиденцијата на Путин во Новгородската област со 91 борбени беспилотни летала. Сепак, украинскиот претседател Володимир Зеленски подоцна ги отфрли руските тврдења. Зеленски рече дека Москва се обидува да ги поткопа дипломатските напори предводени од САД за завршување на војната меѓу Русија и Украина.

„Русија повторно дејствува, користејќи опасни изјави, за да ги поткопа сите достигнувања на нашите заеднички дипломатски напори со тимот на претседателот Трамп“, рече украинскиот лидер.

Share on Facebook

Tweet

Follow us

Save