САД ќе користат вештачка интелигенција за управување со воздушниот сообраќај

Министерот за транспорт Шон Дафи потврди дека владата работи на интегрирање на софтверот за вештачка интелигенција во својот систем за управување со воздушниот сообраќај, пренесе Инекс.хр.

Проект од 12 милијарди долари

Дафи, кој некогаш беше и на чело на НАСА, минатата недела изјави дека софтверот, наречен Стратешко управување со траекторијата на воздушниот простор (SMART), го развиваат три конкурентски компании.

Лице запознаено со ситуацијата подоцна за Блумберг изјави дека Федералната администрација за воздухопловство (FAA) ги ангажирала „Palantir“, „Thales SA“ и „Air Space Intelligence“ да се натпреваруваат за договорот. „Palantir“ подоцна потврди во изјава до инвеститорите дека потпишал договор со „FAA“ за „обезбедување алатки за анализа на податоци што ќе ѝ помогнат на агенцијата да ги постигне своите цели за модернизација на безбедноста во воздухопловството“.

Во вторник, Дафи изјави за „CBS News“ дека проектот „SMART“ ќе чини 12 милијарди долари и треба да им помогне на контролорите на воздушниот сообраќај да планираат летови со недели однапред за да ги минимизираат доцнењата.

„Овој софтвер ќе каже: „Видете, можеме да го предвидиме ова 45 дена однапред. Ајде да ги поместиме некои од тие летови малку подоцна, или пет, седум, десет минути порано, и можеме да го решиме проблемот. На тој начин, нема да доцните“, рече Дафи.

Загриженост за сигурноста

Иако министерот за транспорт тврди дека софтверот „нема да ги замени луѓето во начинот на кој управуваме со воздушниот простор“, постојат очигледни загрижености во врска со воведувањето на вештачката интелигенција во процедурите за воздушниот сообраќај.

Покрај тоа што генерално се склони кон сериозни „халуцинации“, т.е. генерирање неточни информации, системите со вештачка интелигенција досега се покажаа неуспешни во апликации како што се закажување на персоналот, предвидување на безбедноста во сообраќајот, па дури и едноставни задачи како што е ракување со автомат за продажба.

Затоа, ако некои од најдобрите вештачки интелигенции на пазарот не можат ниту да управуваат со автомат за продажба на грицки во канцеларија без да се претворат во еден вид картел, сигурноста на системот на кој би му било доверено управувањето со распоредот на летовите низ целата земја е под знак прашалник.

Share on Facebook

Tweet

Follow us

Save