Саудиска Арабија откажува и одложува испораки на нафта во Европа!

Саудиската државна компанија „Арамко“ откажа или одложи испораки на сурова нафта за дел од европските рафинерии, кои требаше да се натоварат кон крајот на септември, велат извори од пазарот.

Најмалку три европски рафинерии добиле известување дека нивните пратки се откажани или поместени од последните 10 дена на септември за најдоцна до ноември, велат изворите. Уште две рафинерии очекуваат во наредните денови да бидат известени за одложување или откажување на септемвриските пратки.

Еден од изворите изјави дека сите саудиски пратки планирани за товарење во последните 10 дена од септември се под ризик да бидат откажани. Тој додаде дека во пристаништето Јанбу, на Црвеното Море, останале залихи на саудиска нафта за околу пет дена. Оваа информација не е директно потврдена, а „Арамко“ одби да коментира.

Одложувањата укажуваат на продолжен прекин на работата на саудискиот нафтовод Исток-Запад, со капацитет од 7 милиони барели дневно, кој е затворен по нападот на 10 септември.

„Арамко“ уште минатата недела започна да известува дел од европските клиенти дека раните септемвриски испораки од Сиди Керир ќе доцнат околу две недели. Изворите тогаш го поврзаа доцнењето со нападите на јеменските Хути врз саудиски бродови во Црвеното Море.

Оштетувањето на нафтоводот Исток-Запад веројатно дополнително ги влоши доцнењата. Нафтоводот ја транспортира суровата нафта од нафтените полиња во близина на Персискиот Залив до Јанбу, од каде што се извезува кон Аин Сохна во Египет. Потоа нафтата се транспортира преку нафтоводот Сумед, со капацитет од 2,5 милиони барели дневно, до Сиди Керир на медитеранскиот брег.

Според платформата за трговски и аналитички податоци „Вортекса“, саудискиот извоз од Сиди Керир во првите две недели од септември изнесувал околу 1,95 милиони барели дневно, додека пристигнувањата во Аин Сохна биле околу 1,40 милиони барели дневно.

Од Јанбу нема испловено ниту една пратка со саудиска нафта од 11 септември. Овие податоци можеби не ги опфаќаат танкерите кои поради безбедносни причини ги исклучиле своите AIS транспондери.

Европските клиенти кои имаат договори со „Арамко“ ги очекуваат октомвриските распределби, кои вообичаено се објавуваат околу 10-тиот ден од месецот пред товарењето.

Некои европски клиенти, меѓу кои и полската државна компанија „Орлен“, го зголемија купувањето на нафта на спот-пазарот за да го надоместат недостигот од саудиски испораки. „Орлен“ распиша најмалку осум тендери од 11 септември за нафта од Медитеранот, Северното Море и Западна Африка.

Share on Facebook

Tweet

Follow us

Save