Северна Кореја лансира „сомнителна балистичка ракета“ во Источното Море

Северна Кореја во неделата изврши лансирање на „сомнителна балистичка ракета“, соопшти кабинетот на јапонскиот премиер, додека јужнокорејската војска извести дека Пјонгјанг истрелал „неидентификуван проектил“ во Источното Море.

Ова се случи откако Северна Кореја оваа недела ја отфрли резолуцијата на нуклеарниот надзорен орган на ОН против нејзината нуклеарна програма.

Портпарол на Министерството за надворешни работи на земјата изјави дека резолуцијата на Меѓународната агенција за атомска енергија немала „никакво влијание врз ставот на КНДР како држава со нуклеарно оружје“.

Во август, Трамп пред новинарите изјави дека севернокорејскиот лидер Ким Џонг-ун има „57 многу моќни нуклеарни оружја“, повторно истакнувајќи ги нивните односи.

„Знаете што, фактот што се согласувам со него е добра работа, а не лоша работа“, рече Трамп, додавајќи дека нуклеарниот арсенал на Пјонгјанг „никогаш“ не требало да биде дозволен.

Трамп тогаш најави и дека има намера да се сретне со Ким подоцна оваа година, иако не даде дополнителни детали за планот – што би било нивна прва средба откако Трамп првпат беше во Белата куќа.

Во петокот, јужнокорејскиот претседател Ли Џе Мјунг изјави дека го „повикува“ Трамп да го одржи дијалогот со Пјонгјанг, додавајќи дека Сеул работи на олеснување на разговорите меѓу Северна Кореја и САД.

„Не можам со сигурност да кажам колку е веројатно тоа, но исто така е јасно дека мораме да направиме сè што е можно за таа можност да ја претвориме во реалност“, рече тој во врска со потенцијалната средба меѓу американски и севернокорејски претставници.

Сепак, надежите за скорешна средба можеби малку згаснаа откако моќната сестра на Ким, Ким Јо-џонг, ги критикуваше неодамнешните воени вежби во западниот дел на Тихиот Океан, кои ги нарече „проба за војна предводена од САД“.

САД, Јужна Кореја и Јапонија на 11 септември ја завршија воената вежба „Freedom Edge 26“, за која Американската команда за Индопацификот соопшти дека ја унапредила „тројната подготвеност низ Индопацификот“.

„Нашата волја да го браниме нашиот суверенитет ќе биде изразена преку појасни дејствија и никогаш, ама баш никогаш, нема да има промена во курсот на зајакнување на нуклеарното одвраќање од војна“, додаде Ким Јо-џонг во изјавата објавена во петокот од севернокорејската државна новинска агенција КЦНА.

Share on Facebook

Tweet

Follow us

Save