Србија од јуни ќе произвдува хуманоидни роботи

Производството на хуманоидни роботи во Србија ќе започне во јуни и Србија ќе биде првата земја во Европа каде што ќе се произведуваат, најави првиот вицепремиер и министер за финансии Синиша Мали.

Мали за ТВ Прва изјави дека во Србија годишно ќе се произведуваат околу 1.000 до 2.000 роботи.

Тој нагласи дека хуманоидните роботи ќе бидат дел од специјализираната изложба Експо 2027 во Белград следната година.

„Тоа е првата фаза. Втората фаза е да се оди во центарот за обука, видовте како играа оро. Значи, роботите учат. И затоа третата фаза, вештачката интелигенција, е многу важна – тие учат да бидат шанкери, да работат како рецепционери во хотели, да бидат во областите на воената индустрија. Затоа вештачката интелигенција вклучена во работата со роботи е многу важна. И потоа полека, но сигурно, како што учат тие, така учиме сите ние и стануваме попродуктивни и поконкурентни, а тоа е едноставно иднината и шансата за развој“, додаде Мали.

Тој изјави дека посетата на српската делегација на Кина, предводена од српскиот претседател Александар Вучиќ, е историска посета и дека, како што вели, резултатите од посетата ќе бидат видливи во годините и децениите што доаѓаат.

Тој истакна дека најголем впечаток оставило вниманието што српската делегација го добила од домаќините и додаде дека „кога имате српски знамиња што се веат во Пекинг покрај кинеските знамиња, таа гордост не може да се опише“.

Тој исто така нагласи дека делегацијата се сретнала со кинескиот претседател Си Џинпинг во поширок и потесен формат, како и дека Орденот за пријателство, што го доби Вучиќ, е потврда за добрите односи меѓу двете земји.

Share on Facebook

Tweet

Follow us

Save