Трамп со рок до среда: „Без договор со Иран – продолжуваме со бомбардирање“

Доналд Трамп испрати остар ултиматум до Иран, предупредувајќи дека воените операции ќе продолжат доколку не се постигне договор во наредните денови. Во изјава за медиумите, Трамп потенцираше дека рокот за напредок во преговорите истекува во среда. „Доколку нема конкретен резултат, ќе продолжиме со бомбардирањето без двоумење“, изјави тој.

Според него, засилениот притисок има за цел да го принуди Техеран на отстапки поврзани со неговите воени и нуклеарни активности, кои ги оцени како сериозна закана за регионалната и глобалната безбедност.

Од друга страна, официјален Техеран засега нема директен одговор на најновите закани. Сепак, иранските власти и претходно нагласуваа дека нема да прифатат преговори под притисок или закани. Аналитичарите предупредуваат дека ваквата реторика дополнително ги подгрева тензиите на Блискиот Исток и може да доведе до нова ескалација, особено ако дипломатските канали останат блокирани.

Во меѓувреме, меѓународната заедница апелира на воздржаност и итно враќање на преговарачката маса, со цел да се спречи нов бран на насилство во регионот.

Share on Facebook

Tweet

Follow us

Save