Хутите извршија напад врз Ријад, Саудиска Арабија тврди дека ракетите биле пресретнати

Саудиска Арабија потврди дека јеменските Хути се обиделе да извршат напад со балистичка ракета врз главниот град Ријад, наведувајќи дека ракетата била пресретната. Коалицијата предводена од Саудиска Арабија, која се бори против Хутите, исто така соопшти дека бунтовниците се обиделе да нападнат цивилна инфраструктура во пристаништето Јанбу на Црвеното Море, како и во градовите Таиф, Баиш и Фарасан, додавајќи дека и овие напади биле спречени.

Хутите претходно објавија дека извршиле напади со ракети и беспилотни летала врз „чувствителни цели“ во Ријад. Тие не прецизираа кои цели во Ријад биле нападнати, но изјавија дека погодиле и објект на саудиската нафтена компанија „Арамко“ во градот Јанбу на Црвеното Море, кој претставува главен центар за извоз на саудиска нафта.

Хутите изјавија дека нападот бил извршен како одговор на напад врз јеменскиот главен град Сана. Во четвртокот беше регистрирана првата цивилна жртва во конфликтот, откако – според саудиските служби за цивилна заштита – еден жител на Јемен кој живеел во Саудиска Арабија загинал од остатоци на пресретнато беспилотно летало на Хутите.

Во средата, Саудиска Арабија објави дека Хутите се обиделе да извршат напад со беспилотно летало врз Мека – најсветиот град во исламот – но дека леталото било пресретнато. Хутите остро ги негираа овие тврдења.

Share on Facebook

Tweet

Follow us

Save