Шри Ланка воведе неработна среда за да заштеди гориво

Шри Ланка одлучи секоја среда да биде неработен ден за јавните институции како дел од мерките за штедење гориво, во услови на зголемен ризик од недостиг поради глобалните тензии и нарушувањата во снабдувањето со нафта.

Претседателот Ануру Кумара Дисанајаке изјави дека земјата мора да се подготви за најлошото сценарио, иако се надева на стабилизација. Оваа одлука доаѓа по блокадата на Ормускиот теснец, клучна рута низ која минуваат огромни количини нафта кон азискиот регион.

Покрај Шри Ланка, и други азиски земји воведуваат различни мерки за штедење енергија. Во некои држави се намалува употребата на климатизација, се ограничува движењето на возилата или се воведува работа од дома, со цел да се намали потрошувачката на гориво.

Новата четиридневна работна недела во Шри Ланка ќе важи и за образовните институции, но не и за службите од суштинско значење како здравството. Средата е избрана како дополнителен слободен ден за да не се создаде тридневен прекин во работата на институциите.

Воедно, воведен е и систем на ограничување на гориво преку национални дозволи, што предизвика незадоволство кај дел од населението поради ниските квоти. Овој систем веќе беше применет за време на економската криза во 2022 година, кога земјата се соочи со сериозен недостиг на девизи и основни ресурси.

Цените на нафтата во меѓувреме значително пораснаа и се движат околу 100 долари по барел, што дополнително го зголемува притисокот врз економиите зависни од увоз.

Share on Facebook

Tweet

Follow us

Save