Блумберг: САД и Иран се приближуваат до пресврт што би можел да доведе до крај на војната

САД и Иран се приближуваат до можен пресврт во односите, кој би можел да отвори пат за завршување на војната, објави американската новинска агенција „Блумберг“.

Според агенцијата, по убедливата победа на демократите на изборите за Конгресот на САД, претседателот Доналд Трамп се откажал од заканите за нов бран воздушни напади врз Иран. Ова придонело за пад на светската цена на нафтата, која се спуштила под 100 долари за барел.

Катар и Пакистан ги предводат дипломатските напори, додека Вашингтон и Техеран „активно разгледуваат нови предлози за уредување на односите“, наведува „Блумберг“.

САД бараат Иран веднаш да ги запре целните напади со дронови и ракети врз пловилата во регионот, како и повторно да го отвори Ормускиот Теснец.

За возврат, Вашингтон разгледува можност за ублажување на строгите економски санкции, одмрзнување на блокираните ирански средства и укинување на поморската блокада на иранските пристаништа.

Според извештајот, врховниот лидер на Иран, Моџтаба Хамнеи, неодамна ѝ дал изречно овластување на иранската влада да преговара за официјално завршување на конфликтот.

Пред ноемвриските избори во САД, Трамп се закануваше дека ќе ја „заврши работата“ со кампања на масовни бомбардирања. По изборниот пораз, тој јасно ставил до знаење дека се откажува од плановите за нови напади.

„Блумберг“ наведува дека американските гласачи во голема мера го казниле Трамп поради последиците од војната со Иран врз домашната економија. Според анализата на агенцијата, конфликтот ги зголемил годишните трошоци за гориво за повеќе од 1.120 долари по домаќинство, додека цените на моторните горива пораснале за 39 проценти.

Се очекува новото мнозинство на демократите во Конгресот да изврши силен притисок врз Белата куќа официјално да ја заврши воената кампања против Иран пред почетокот на новата конгресна сесија во јануари.

Во меѓувреме, иранскиот министер за надворешни работи Абас Арагчи започнал интензивна телефонска дипломатија со земјите од Блискиот Исток, меѓу кои Саудиска Арабија, Обединетите Арапски Емирати, Катар, Египет и Турција, со цел да обезбеди регионална поддршка за рамката на планот за деескалација.

Истовремено, секретарот на иранскиот Совет за национална безбедност, Мохсен Резаи, се сретнал со рускиот претседател Владимир Путин за да му пренесе директна порака поврзана со предложената рамка.

Share on Facebook

Tweet

Follow us

Save