Трамп, Путин и Си Џинпинг на иста маса, Кина потврди разговори за историска средба

Кина потврди дека се водат разговори за организирање заедничка средба меѓу американскиот претседател Доналд Трамп, рускиот претседател Владимир Путин и кинескиот лидер Си Џинпинг. Доколку се реализира, тоа би била историска средба на тројцата лидери, во период на сериозни геополитички тензии и војни во повеќе делови од светот, објави денеска Асошиејтед прес.

Портпаролката на кинеското Министерство за надворешни работи, Мао Нинг, потврди дека Пекинг комуницира со заинтересираните страни за можноста тројцата претседатели да се сретнат во текот на ноември.

Потенцијалната средба би се одржала на маргините на самитот на Азиско-пацифичката економска соработка (АПЕК) во кинескиот град Шенжен. Засега нема конечен договор за одржувањето на состанокот, ниту официјално потврдена агенда.

Трамп веќе најави дека е заинтересиран за разговори со Путин и Си Џинпинг, особено за прашањата поврзани со контролата на нуклеарното вооружување. Рускиот претседател, пак, сака во фокусот да биде војната во Украина.

Според дипломатските извори и аналитичарите што ги цитира Асошиејтед прес, Москва гледа можност преку ваква средба да ја зајакне својата дипломатска позиција, додека Пекинг настојува да одржува балансирани односи со Вашингтон и Москва.

Можниот состанок доаѓа во момент кога САД и Кина се обидуваат да го зачуваат кревкиот трговски договор, кој треба да истече во јануари.

Американскиот трговски претставник Џејмисон Грир во петокот побара од кинеските власти целосно да ги исполнат преземените обврски во однос на купувањето земјоделски производи и снабдувањето со ретки земни метали и други критични минерали.

Кинеската страна, од друга страна, изразила загриженост поради американските ограничувања во трговијата со Кина.

Аналитичарите предупредуваат дека интересите на трите светски сили значително се разликуваат, особено околу Украина, Иран и нуклеарното вооружување. Поради тоа, евентуалната средба би можела да има поголемо дипломатско и симболично значење отколку да донесе конкретни договори.

Сепак, самото собирање на лидерите на САД, Русија и Кина на заедничка маса би претставувало значаен дипломатски настан со потенцијални последици за меѓународните односи.

Share on Facebook

Tweet

Follow us

Save