(Видео) Страшно невреме во Германија: торнадо корнеше дрвја и покриви, загина жена

Силно невреме вчера зафати делови од Германија и предизвика огромна материјална штета, а во градот Фирстенвалде во покраината Бранденбург беше потврдено торнадо, објави весникот „РНД“.

„Настанот во Фирстенвалде несомнено беше торнадо“, потврди Германската метеоролошка служба (ДВД).

Силниот ветер соборил повеќе дрвја низ градот, а според снимките и фотографиите од местото, на еден објект му бил откорнат и покривот.

На терен до доцна во ноќта интервенирале пожарникари и полицајци.

Во градот Валдорф, во Рајнска Област-Пфалц, жена била погодена од паднато дрво и починала од повредите. Друга жена била тешко повредена, соопшти полицијата.

Двете жени, на возраст од 58 и од 47 години, наводно се движеле заедно кога се приближило невремето и побарале засолниште под наткриен дел со клупи.

Во тој момент, невремето искорнало блиско дрво, кое паднало врз засолништето и ги погодило двете жени. Потпарол на полицијата изјави дека 58-годишната жена починала на местото на настанот.

Другата жена била пренесена во болница.

Во градот Хер-Гренцхаузен, во областа Вестервалд, невремето урнало делови од ѕидовите на објекти.

Најмалку две згради биле погодени, а низ целото подрачје биле искорнати дрвја.

Во општината Банбершајд, исто така во областа Вестервалд, силниот ветер однел делови од фасадата на спортската сала „Аубахале“. Регистрирани биле и големи прекини во снабдувањето со електрична енергија.

Окружната управа доцна вечерта соопшти дека во областа Вестервалд биле активирани бројни екипи за интервенции. Биле оштетени повеќе објекти, а прекините на електричната енергија зафатиле голем број домаќинства.

Службите интервенирале на повеќе од 100 места. На автопатот А61 силните налети на ветерот превртеле камион.

Германската метеоролошка служба претходно предупреди на силни невремиња во вечерните часови, особено во северниот дел на Рајнска Област-Пфалц. Предупредувањето подоцна било укинато.

Во Хесен, во областа Лан-Дил, невремето оштетило околу 60 куќи, соопшти противпожарната служба. Штетата се движела од откорнати поединечни ќерамиди до целосно уништени покриви.

Дел од покривите, според информациите, биле однесени и до 100 метри од објектите.

Торнадата се ретки во Германија, но во последните години се регистрираат сè почесто. Тоа, меѓу другото, се поврзува и со климатските промени. Минатата година во Германија биле потврдени 46 торнада.

Според Германската метеоролошка служба, торнадо, познато и како воздушен вртлог, е „столб од воздух што е во контакт со тлото, се врти околу повеќе или помалку вертикална оска и се наоѓа под кумулиформен облак“.

Share on Facebook

Tweet

Follow us

Save