Енергетскиот договор меѓу Венецуела и САД ќе важи 25 години

Енергетскиот договор што беше постигнат меѓу Венецуела и САД е за период од 25 години, објасни привремената претседателка Делси Родригез , цитирана од Ројтерс.

Според неа, целта на договорот е да се зголеми производството на сурова нафта на 1,5 милиони барели дневно и да се зачува суверенитетот на земјата над нејзините природни ресурси.

Родригез го опиша договорот како „историски“ и рече дека тој ќе помогне во заживувањето на економијата и зголемувањето на владините приходи, а воедно ќе придонесе и за одредување на иднината на земјата.

„Овој билатерален проект со 25-годишен рок предвидува развој на 17 стратешки нафтени полиња со цел производство на над 1,5 милиони барели дневно. Оваа бројка се однесува исклучиво на билатералниот договор меѓу Венецуела и САД“, прецизираше таа.

Претседателот додаде дека целта од 1,5 милиони барели дневно поставена во договорот е само почетна и дека поголемиот план вклучува и развој на осум нови нафтени полиња (т.н. проекти „гринфилд“) како дел од поширокото проширување на енергетскиот сектор на земјата.

Венецуела има најголеми докажани резерви на нафта во светот, но произведува само околу 1,25 милиони барели дневно – далеку под својот потенцијал – поради години недоволно инвестирање, лошо управување и санкции.

Таа рече дека договорот би можел да и донесе на земјата околу 209 милијарди долари приходи по цена на основна нафта од 65 долари за барел, иако призна дека цените на суровата нафта би можеле да варираат. Таа рече дека приближно 19 долари од секој барел произведен и продаден според договорот ќе оди директно во Венецуела, обезбедувајќи поттик на владините приходи.

Сепак, Делси Родригез е непоколеблива во ставот дека Венецуела ја задржува „сопственоста и суверенитетот“ над своите природни ресурси, „додека користи капитал, технологија и оперативно искуство за да помогне во обновата на стратешкиот сектор сериозно погоден од санкциите“.

Вчера, десетици провладини групи се собраа во центарот на Каракас во знак на протест против присуството на САД во Венецуела.

Венецуелските власти се подготвуваат да потпишат договори следната недела со кои ќе им се дадат нови права за истражување и производство на нафта на неколку компании, вклучително и оние од Соединетите Американски Држави.

Според извори, „Шеврон“ е меѓу компаниите за кои се очекува да ги финализираат разговорите за префрлање на нивните заеднички вложувања во Венецуела во новата енергетска рамка на земјата.

Share on Facebook

Tweet

Follow us

Save