Историски момент: Грција добива астронаут во Вселената

Човекот кој треба да стане првиот грчки астронаут го опиша својот избор не само како чест, туку и како остварување на долгогодишен сон.

„Чест и радост е да ја претставувам Грција во вселената“, изјави Адрианос Големис за грчката новинска агенција АМНА, во интервју во кое зборуваше за својата досегашна кариера, долгогодишното искуство како лекар за летови во Европската вселенска агенција (ЕСА) и подготовките за учество во мисијата PAM-6 до Меѓународната вселенска станица следната година.

„Очигледно, за мене има и елемент на сон. Отсекогаш сакав да имам можност да летам во вселената, но чувството е многу поинтензивно и подлабоко затоа што ова ќе го направиме со експерименти од грчки универзитети и компании од нашата земја“, рече тој.

Тој додаде дека целта на мисијата е Грција да се постави во првите редови и да се зајакне секторот за истражување и иновации.

„Воздухопловно-вселенскиот сектор во Грција веќе е силен и многу е убаво што ќе додадеме уште една коцка во таа градба“, истакна Големис.

Тој посебно ги спомена Министерството за дигитално управување и Грчкиот вселенски центар, „кои многу помогнаа“.

Големис официјално беше претставен како член на екипажот на мисијата во средата, на Меѓународниот вселенски самит во Париз. Тој е лекар и главен лекар на медицинскиот тим задолжен за астронаутите во Европската вселенска агенција.

Големис го проучувал влијанието на долготрајните вселенски мисии врз човечкото тело, а претходно годинава стана првиот Грк избран за програмата за обука на астронаути на ЕСА. Неговата почетна обука вклучуваше подготовка за живот и научна работа на Меѓународната вселенска станица.

Летот е планиран за 2027 година и ќе биде дел од првата приватна мисија до Меѓународната вселенска станица. Транспортот ќе го изведува SpaceX со вселенското летало Dragon, кое ќе биде лансирано со ракета Falcon 9. Мисијата ќе ја предводи Французинот Томас Песке, додека Големис ќе учествува како специјалист на мисијата.

Големис бил лекар на Песке за време на неговата претходна мисија.

„Многу убава случајност е што сега ќе летаме заедно. Како што ми рече тој, сега и јас ќе ги гледам работите од другата страна“, рече Големис.

Доколку ги добие потребните одобренија, Големис ќе стане првиот грчки астронаут кој ќе отпатува во вселената, што ќе претставува историски момент за Грција.

Share on Facebook

Tweet

Follow us

Save