Крајнодесничарската АФД со најголеми шанси за победа на покраинските избори во Германија

На помалку од еден месец пред важните избори во источногерманската федерална покраина Саксонија-Анхалт, копретседателот на Левичарската партија изјави дека ќе стори сè за да ја спречи крајнодесничарската Алтернатива за Германија (АФД) да дојде на власт.

„Ние, Левицата, покажавме во последните години дека преземаме одговорност за оваа земја“, изјави Луиџи Пантисано за јавната телевизиска станица ЗДФ.

Меѓу мерките што би ги разгледал е давање поддршка на конзервативната Христијанско-демократска унија (ЦДУ), партијата на канцеларот Фридрих Мерц, која Пантисано неодамна ја обвини за спроведување „фашистички политики“.

Неговите изјави дојдоа пред изборите кои ќе се одржат на 6 септември, на кои крајнодесничарска партија би можела да дојде на чело на покраинската влада за прв пат во повоената историја на Германија.

АФД досега не учествувала во ниедна владина коалиција во 16-те федерални покраини на Германија или на федерално ниво, бидејќи сите други големи партии одбиваат да соработуваат со неа, политика позната како „заштитен ѕид“.

Но, со поддршка од над 40 проценти според анкетите во Саксонија-Анхалт, АФД има сериозни шанси да освои апсолутно мнозинство на места во покраинскиот парламент во Магдебург, во зависност од тоа дали неколку помали партии ќе останат под изборниот праг од пет проценти потребен за влез во парламентот.

Доколку АФД не освои мнозинство, анкетите покажуваат дека сегашниот шеф на покраинската влада од ЦДУ, Свен Шулце, ќе може да формира влада само со поддршка на Левицата, наследникот на Партијата на социјалистичкото единство што владееше со поранешна Источна Германија, која според анкетите е трета во Саксонија-Анхалт.

Сепак, конзервативната ЦДУ официјално ја отфрли соработката и со АФД и со Левицата. Пантисано рече дека клучното прашање е дали Шулце ќе биде подготвен да ја преземе одговорноста по изборите.

Share on Facebook

Tweet

Follow us

Save