Малолетничките кои малтретираа и снимаа упатени во воспитно-поправен дом – пресуда за бруталното насилство во Ѓорче Петров!

На четирите малолетнички против кои се водеше постапка за бруталното насилство врз 13-годишно девојче во скопската општина Ѓорче Петров им е изречена мерка упатување во воспитно-поправен дом.

Според информациите, судија за деца во Основниот кривичен суд Скопје изрекол мерка во траење од една година за првообвинетата малолетничка, додека за останатите три мерката е во траење од по осум месеци.

Одлуката сè уште не е правосилна. Судската одлука е во фаза на писмена изработка и сè уште не е експедирана, односно доставена до странките, потврдуваат од Кривичниот суд.

– За предметот со насилство со малолетници од Ѓорче со оглед да се работи за малолетници деца и постапката е тајна, можам да ви потврдам дека случајот е првостепено завршен и изречена им е мерка – заводско воспитна мерка – упатување во воспитен дом и тоа една година за две деца една година а за две деца 8 месеци, соопштија од Кривичниот суд.

Станува збор за случајот што ја вознемири јавноста откако група деца во два наврати физички малтретирале 13-годишно девојче, ученичка во основно училиште во Ѓорче Петров, додека дел од присутните го снимале насилството со мобилни телефони.

На снимките се гледа како девојчето е опкружено од група врсници, по што следуваат кубење за коса, туркање на земја, клоци и удари по лицето. Дел од присутните деца се смеат, додека други го снимаат малтретирањето.

Особено вознемирувачка беше и фотографијата на која две од девојчињата се фотографираат со жртвата додека таа крвари од носот и устата.

По откривањето на случајот, Основното јавно обвинителство Скопје поведе постапка против четири малолетнички, една на возраст од 17 години која во меѓувреме стана и полнолетна, како и против три девојчиња на возраст од 14 години, поради основано сомнение за кривичното дело „насилство“.

Обвинителството тогаш информираше дека малолетничките учествувале во дејствија на насилство во два одвоени настани, а постапката се водела согласно Законот за правда за децата.

Во врска со истиот случај, до Обвинителството беа доставени и шест кривични пријави против родители за „запуштање и малтретирање дете“, поради сомнежи дека ја запоставиле должноста за грижа и воспитување. За исходот од тие пријави засега нема информации во доставените податоци.

Со новата судска одлука, постапката против четирите малолетнички добива првостепен исход, но мерките сè уште не се правосилни и останува можноста за нивно преиспитување во понатамошната постапка.

Share on Facebook

Tweet

Follow us

Save