INFOMAX.MK

Претседателот Стево Пендаровски денеска го прими претседателот на Република Албанија, Илир Мета, кој е во посета на Република Македонија.

Според соопштението од Кабинетот на претседателот, на средбата се разменети мислења за севкупните билатерални односи меѓу двете држави, при што е изразено задоволство од нивниот позитивен развој преку конструктивна соработка и размена на посети на највисоко ниво.

На средбата е констатирано дека Република Македонија и Република Албанија, преку посветеноста на добрососедските односи, даваат силен придонес за просперитетот, стабилноста и безбедноста на регионот, како и за неговата европска перспектива.

Двете држави, исто така, како сојузници во НАТО, даваат свој придонес и во одбраната на вредностите на евроатлантската заедница.

Во контекст на аспирациите за членство во Европската Унија, според соопштението, двајцата претседатели ја констатираа потребата за деблокирање на процесот и скорешен почеток на пристапните преговори на двете држави за членство во Европската Унија, што според нив, ќе има позитивен придонес за севкупниот напредок и стабилноста на регионот.

Претседателот Пендаровски упати честитки по повод изборот на Република Албанија за непостојана членка на Советот за безбедност на Обединетите нации во периодот 2022-2023 година.