Млитава Европа: Децата и адолесцентите во сè полоша физичка форма

Децата и адолесцентите во Европа не достигнуваат соодветно ниво на физичка подготвеност во однос на силата, флексибилноста и телесната композиција, покажува ново истражување.

Истражувачите од Универзитетот во Сарагоса утврдиле дека здравствено релевантната физичка подготвеност кај децата и адолесцентите во Европа се намалува од 1990 година до денес.

Наодите, објавени во списанието „Sports Medicine – Open“, ги анализираат промените во главните показатели на физичкото здравје: мускулната сила, флексибилноста, телесната композиција и кардиореспираторната кондиција.

Овие компоненти се клучни фактори за сегашното, но и за идното здравје на оваа популација, поради што авторите предупредуваат дека „пропуштаме голема можност која тешко ќе може да се надомести“.

Студијата опфатила 417.362 учесници на возраст од 6 до 16 години од 20 европски земји, во периодот од 1965 до 2023 година.

Истражувачите утврдиле дека силата на горниот дел од телото генерално се намалува од 1970-тите години. Следувал краток период на стабилизација меѓу 1980 и 2000 година, по што повторно бил забележан пад.

Силата на долниот дел од телото, мерена преку тестови со скокање, се зголемувала до 1980-тите години, но оттогаш континуирано се намалува.

Тимот исто така забележал континуирано и постепено влошување на телесната композиција, што се одразува преку зголемување на телесните масти. Истражувачите предупредуваат дека овој тренд често се потценува доколку се користи само индексот на телесна маса (BMI).

Најлошиот тренд е забележан кај флексибилноста, која континуирано се намалува, а падот особено се забрзал по 2000 година.

Кога станува збор за кардиореспираторната кондиција – односно способноста на срцето, белите дробови и крвните садови ефикасно да доставуваат кислород до мускулите за време на продолжена физичка активност – авторите забележуваат дека, по долгорочен пад, најновите податоци укажуваат дека трендот можеби се стабилизирал во периодот од 2015 до 2023 година.

Сепак, тие предупредуваат дека нивото и понатаму е пониско во споредба со претходните децении.

„Овие наоди ја потврдуваат потребата од засилување на напорите за промовирање на физичката активност преку јавните институции“, соопштиле истражувачите.

Физичката подготвеност е важен показател за здравјето во детството и адолесценцијата, истакнуваат авторите.

Добрата кардиореспираторна издржливост и здравата телесна композиција во детството и адолесценцијата се поврзани со подобар кардиоваскуларен профил и помал ризик од смртност во подоцнежниот живот.

Мускулната сила во овие периоди, пак, е поврзана со поздрава телесна композиција.

Светската здравствена организација (СЗО) препорачува децата и адолесцентите да практикуваат најмалку 60 минути физичка активност со умерен до висок интензитет секој ден, вклучително и активности за зајакнување на мускулите и коските најмалку трипати неделно.

Сепак, повеќе од 75 отсто од европските адолесценти не ги исполнуваат овие препораки.

На глобално ниво, СЗО наведува дека физичката неактивност е причина за околу 6 отсто од оптоварувањето со болести поврзани со коронарна срцева болест, 7 отсто од дијабетесот тип 2, 10 отсто од случаите на рак на дојка и 10 отсто од случаите на рак на дебелото црево.

Дополнително, физичката неактивност се поврзува со 9 отсто од предвремените смртни случаи, 7,2 отсто од смртноста од сите причини и 7,6 отсто од смртните случаи предизвикани од кардиоваскуларни заболувања.

Share on Facebook

Tweet

Follow us

Save