Напад врз нафтениот гигант „Арамко“ во Ријад, шрапнели оштетија административна зграда

Канцелариите на „Сауди Арамко“ (Saudi Aramco) во Ријад беа цел на напад во неделата, додека Саудиска Арабија се соочува со нов бран удари од Хутите во Јемен, кои имаат поддршка од Иран.

Административна зграда на саудискиот државен нафтен гигант претрпе штета од паднати шрапнели, соопштија Министерството за енергетика и Саудиската новинска агенција. Според нив, нема загинати ниту повредени.

Главната канцеларија на „Арамко“ во саудиската престолнина се наоѓа во финансискиот кварт „Крал Абдула“, каде што веќе околу еден месец е во сила наредба за работа од далечина.

Неделниот инцидент е уште еден во низата удари врз инфраструктурата на „Арамко“ во последните недели. Меѓу целите беа седиштето на компанијата во Дахран и нафтеното поле Шајба во Источната провинција.

Ова е можеби и најзначајниот напад врз Ријад откако минатиот месец борците на Хутите го нападнаа главниот аеродром во градот. Тогаш загинаа повеќе од 12 лица, стотици беа повредени, а воздушниот сообраќај кон и од кралството беше сериозно нарушен.

Настаните викендов се закануваат дополнително да го зголемат притисокот врз саудискиот престолонаследник Мохамед бин Салман. Тој настојува неговиот план за диверзификација на економијата, вреден неколку билиони долари, да се одвива според предвиденото, додека се справува со последиците од речиси секојдневните напади на Хутите.

Силите предводени од Саудиска Арабија во неделата соопштија дека пресретнале балистички и крстосувачки ракети истрелани кон Ријад и спречиле напади на југот и на истокот.

Овие настани се случуваат во време кога на Блискиот Исток сè повеќе се шпекулира за натамошниот тек на војната меѓу САД и Иран и за изборите во Израел. По повеќемесечен застој, Вашингтон и Техеран се приближуваат до можен пробив во напорите да се стави крај на конфликтот, објави „Блумберг“.

Во Израел, Гади Ајзенкот, изборниот ривал на премиерот Бенјамин Нетанјаху, е чекор поблиску до тоа да стави крај на премиерскиот мандат на Нетанјаху, откако доби можност да формира нова влада.

Share on Facebook

Tweet

Follow us

Save