Путин нареди тридневен прекин на нападите врз Киев поради посетата на Кушнер и Виткоф и нуклеарната централа Запорожје

Рускиот претседател Владимир Путин наредил да не се напаѓа Киев три дена, почнувајќи од полноќ, изјави портпаролот на Кремљ, Дмитриј Песков, пренесуваат руските медиуми.

Ова се случува откако пратениците на американскиот претседател, Џаред Кушнер и Стив Виткоф, пристигнаа во Москва, каде денеска ќе се сретнат со Путин. Утре тие треба да отпатуваат во Киев на средба со украинскиот претседател Володимир Зеленски. Доколку посетата се реализира, тоа ќе биде прва посета на Кушнер и Виткоф на Киев.

Украинскиот претседател Володимир Зеленски утрово ја обвини Русија дека се обидува да ја спречи посетата на Киев.

Синоќа руската армија ги нападна аеродромите „Киев“ и „Бориспол“, на кои евентуално би можел да слета авионот со американските претставници.

„Очигледно, ваквите руски напади врз аеродромите се реакција на разговорите и подготовките за можноста американската страна да дојде во Украина со авион и да слета на еден од двата аеродроми. Руско-ирански „Шахед“ како одговор на американската дипломатија“, коментираше Зеленски.

Тој предупреди дека следната недела Украина „ќе ја коригира“ својата операција во однос на рускиот воздушен простор, кој „стана опасен поради присуството на дронови и ракети“.

„Украина лично му предложи на Путин режим на прекин на огнот за време на посетата, но одговор немаше“, изјави шефот на кабинетот на украинскиот претседател, Кирило Буданов.

Во меѓувреме, руското Министерство за одбрана продолжи со нападите врз украинските градови. Од руското МО соопштија дека биле погодени металуршкиот комбинат „Днепродзерџинск“ и „Днепропетровскиот металуршки завод“, како и складиште и електроцентрала во Николаевската област. Наведени се и логистички центар и брод со „оружје и воена опрема за вооружените сили на Украина“ во Одеската област, меѓу други цели.

Пет лица загинале, а пет се повредени во нападот врз едно од претпријатијата во Днепропетровската област, соопштија украинските власти. Во Запорожје бил уништен паркинг за камиони. Од украинските воздухопловни сили соопштија дека во текот на ноќта биле соборени или потиснати со електронско попречување 128 од вкупно 167 руски дронови.

Киев бил нападнат и со балистички ракети „Искандер“. Во Буча биле нападнати складишта, додека во Бориспол бил уништен деветкатен станбен блок, при што две лица биле повредени.

Руското Министерство за одбрана не извести за соборени украински дронови или ракети над руска територија, што според информациите укажува дека Украина го почитува објавениот прекин на огнот.

Синоќа Зеленски изјави дека за време на викендот, додека Виткоф и Кушнер ќе престојуваат во Москва и Киев, „Украина ќе обезбеди нормално функционирање на рускиот воздушен простор, за преговарачите безбедно да пристигнат“.

„Од наша страна воздушни напади нема да има, а Русија треба да гарантира огледална тишина, без воздушни напади, за времето потребно за одржување на овие преговори и решавање на логистичките прашања“, изјави тој.

„Имаме идеја за мир. Ќе видиме дали ќе успееме да постигнеме нешто“, изјави американскиот претседател Доналд Трамп. Според него, постојат „добри шанси за мир“.

Share on Facebook

Tweet

Follow us

Save