Рама за Зврнец: Не можам да кажам „не“ на 4 милијарди евра

Албанскиот премиер Еди Рама во интервју за германската јавна телевизија „ЗДФ“ говореше за проектот во Зврнец, протестите и политичката ситуација во земјата.

Тој оцени дека проектот во Зврнец претставува инвестиција вредна повеќе од четири милијарди евра и дека Албанија не може едноставно да каже „не“ на таква можност.

Во однос на протестите, Рама нагласи дека постојат „две страни на медалјата“ – од една страна се обичните граѓани кои имаат свои причини да излезат на улица и кои, според него, заслужуваат разбирање, а од друга страна се организаторите на протестите.

Повеќе од еден месец, секоја вечер во Тирана се одржуваат протести против планираниот луксузен туристички комплекс во лагуната Зврнец и на островот Сазан. Зад проектот стои, меѓу другото, инвестициска компанија на Џаред Кушнер, зетот на Доналд Трамп. Еколошките организации предупредуваат дека проектот може сериозно да ја наруши заштитената област со птици и мочуришта.

Со текот на времето, протестите прераснаа и во поширок протест против корупцијата, недостигот на транспарентност и против владата на Рама. Тој ги отфрли овие обвинувања.

Во интервјуто, Рама изјави дека земјиштето е приватна сопственост и дека развојот на приватниот имот во Албанија се врши преку договор меѓу сопствениците и инвеститорите. Тој нагласи дека сè уште нема конечен план за проектот и дека државните институции внимателно проверуваат дали ќе бидат почитувани сите стандарди и еколошки правила.

На прашањето за измените на законите за заштита на природата, Рама рече дека не биле направени измени со цел да се дозволи градба во строго заштитените зони и дека различните заштитени подрачја имаат различен степен на заштита според европските стандарди.

Тој потврди дека во дел од локацијата се вршат подготвителни работи, но истакна дека нема издадена градежна дозвола за градба на туристичкиот комплекс.

Во врска со сопственичките спорови, Рама рече дека државните институции постапуваат врз основа на важечки документи, а не врз основа на тврдења и барања што сè уште не се потврдени од суд.

Запрашан дали проектот ќе продолжи, Рама одговори: „Не можеме едноставно да кажеме ‘не’ на инвестиција вредна повеќе од четири милијарди евра. Ако конечниот резултат биде разочарувачки, тогаш нема да продолжиме со него.“

Говорејќи за протестите, тој рече дека граѓаните имаат право да протестираат и да ја критикуваат владата, но направи разлика меѓу „обичните граѓани“ и организаторите кои, според него, ги насочуваат протестите.

„Луѓето имаат многу различни причини да излезат на улица и јас ги разбирам. Но, протестното движење има два дела – граѓаните кои ги почитувам и организаторите кои ги водат и контролираат протестите. Тоа се две сосема различни работи“, изјави Рама.

Share on Facebook

Tweet

Follow us

Save